१५ बुँदे घोषणापत्रसहित पुष्कर ओझा प्यानल घोषणा

पहुरा समाचारदाता
धनगढी, १६ भदौ । अइना भदौ २८ गते हुइना चुनावके लाग कैलाली उद्योग वाणिज्य संघका अध्यक्ष पदके उम्मेदवार पुष्कर ओझा नेतृत्वके प्यानल घोषणा करल बा ।

“व्यवसायीके हित, सबल नेतृत्वके जीत” नारासहित अध्यक्षके उम्मेदवार ओझासे सोम्मार धनगढीमे विशेष कार्यक्रम करटी प्यानल घोषणा करल हुइट कलेसे १५ बुँदे घोषणापत्र समेत सार्वजनिक करल बा ।

घोषणापत्रमे उद्योग व्यवसायीहे दुर्घटना बीमा सुविधा निःशुल्क उपलब्ध करैना, विद्युत् तथा संकट प्रभावित व्यवसायीहे राहत तथा पुनःस्थापना कार्यक्रम सञ्चालन कैना, घर, पसल तथा गोदाममे सुरक्षा प्रणाली लागू कैनालगायतके कार्यक्रम समावेश बटै ।
ओस्टेक करके उद्योग व्यवसायीहे डिजिटलाइज कैना, कर प्रणाली सरलीकरणके लाग सरकारी निकायसँग सहकार्य कैना, व्यवसायीसे भोगेपर्ना प्रशासनिक समस्यामे सुधार ल्यन्ना, पर्यटन, कृषि, औद्योगिक उत्पादनहे प्रवद्र्धन कैना लगायतके योजना प्रस्तुत करल बा ।

घोषणापत्रमे स्थानीय उत्पादनहे प्राथमिकता डेटी “मेडइन सुदूरपश्चिम” अभियान सञ्चालन कैना ओ राष्ट्रिय तथा अन्तर्राष्ट्रिय स्तरमे “सुदूरपश्चिम एक्सपो” आयोजना कैना प्रतिबद्धता राखल बा । साथे, व्यवसायहे आकर्षित कैना राहत ओ नेपालके उद्योगी, लगानीकर्ताहे लक्षित करटी लगानी सम्मेलन कैना घोषणाफे करल बा ।

प्यानलके उम्मेदवारसे अपन घोषणापत्र व्यवसायीके आवश्यकता ओ समस्याहे सम्बोधन कैना खालके रहल दाबी करले बटै । ओइने युवाहे उद्यमशीलता, रोजगारी ओ सीप विकासमार्फत आत्मनिर्भर बनैना योगदान कैना बटैले बटै ।

ओझा प्यानलसे व्यवसायीहे निःशुल्क बीमा सुविधा, विद्युत् तथा संकट प्रभावित व्यवसायीके लाग राहत कार्यक्रम ल्यन्ना बटैले बा । घर–पसलमा सुरक्षा प्रणाली जडान कैना तथा व्यवसायीहे डिजिटलाइज कैना योजना ल्यन्ना प्रतिबद्धता सार्वजनिक करले बा ।

कौन पदमे के उम्मेदवार ?

नयाँ कार्यसमितिके लाग पुष्करराज ओझाके नेतृत्वमे प्यानल खडा करल बा । प्यानलमे वरिष्ठ उपाध्यक्षमे ओम बहादुर बिष्ट, उपाध्यक्ष (उद्योग) ओर वासुदेव भट्ट, उपाध्यक्ष एसोसिएट तर्फ मनोज अग्रवाल, उपाध्यक्ष वाणिज्य ओर गगनराज केसी, उपाध्यक्ष वस्तुगत ओर भीमराज ओझा (अबु) महासचिवमे दिनेश लम्साल, कोषाध्यक्षमे सुरेन्द्र बहादुर कडायत ओ सचिवमे कृष्ण कुमारी बिष्टके उम्मेदवारी रना हुइल बा ।

ओझा प्यानलमे सदस्यमे अजय पाण्डेय, सुरेश सापकोटा, बम बहादुर कुँवर, ध्रुबराज दाहाल, कमला भट्टराई, पदमबहादुर सिंह, प्रजापति जोशी, रेखा बास्तोला, सुरज बहादुर रैका, तर्कराज भट्ट, टेकबहादुर खड्का, अनुप भण्डारी ओ बिन्दु सुनारके नाम समावेश करल बा ।

“व्यवसायीके हित, सबल नेतृत्वके जीत” नारासहित प्रस्तुत घोषणापत्रमे व्यवसायीके सुरक्षा, पारदर्शिता, सहकार्य, डिजिटलाइजेसन ओ स्थानीय उत्पादन प्रवद्र्धनहे विशेष प्राथमिकता डेहल बा ।

ओझासे प्यानल घोषणा करटी कहलै, “हम्रे युवाके उत्साह, अनुभवी व्यवसायीके ज्ञान ओ इमान्दार नेतृत्वके संयोजन हौं । उद्यमशीलता, समृद्धि ओ सुरक्षाके डगरमे सक्कु व्यवसायीहे साथ लेके आघे बह्रना हमार उद्देश्य हो ।”

घोषणापत्रके १५ प्रमुख प्रतिवद्धता

प्यानलसे प्रस्तुत करल १५ प्रतिबद्धतामध्ये कुछ उल्लेख्य बुँदा यी मेरिक बटै ।

प्रत्येक व्यवसायीहे रु. १ लाख बराबरके निःशुल्क दुर्घटना बीमा सुविधा ।
संकटमे परल व्यवसायीहे तत्काल राहत ओ पुनःस्थापनामे सहयोग ।
घरभाडा, कर, पार्किङ, अवैधानिक आयात लगायतके समस्यामे तीनु तहके सरकारसँग समन्वय ।
संघहे पूर्ण रूपमे डिजिटलाइजेसन करटी सक्कु आय–व्यय पारदर्शी बनैना ।
बैंकिङ, कर, भन्सार तथा बीमा क्लेम समस्याके समाधानके लाग पाँच सदस्यीय फास्ट ट्रयाक समिति गठन ।
महिला ओ युवा व्यवसायीके लाग स्टार्टअप समर्थन कार्यक्रम स्थापना ।
मानव स्रोत केन्द्र स्थापना करके सिपमूलक तालिम ओ व्यावसायिक परामर्श निःशुल्क उपलब्ध करैना ।
पर्यावरण प्रवद्र्धन, हरियाली अभियानमे सहकार्य ओ ‘सुन्दर सुदूरपश्चिम अभियान’ पुनर्जीवित कैना ।
अभियानमार्फत स्थानीय उत्पादनहे राष्ट्रिय तथा अन्तर्राष्ट्रिय बजारमे प्रवद्र्धन कैना ।
भारतके उत्तराखण्ड ओ उत्तर प्रदेशके व्यापार मण्डलसंग सहकार्य आयोजना कैना ।

व्यवसायमैत्री वातावरणके वचन

ओझा समूहसे आपन घोषणापत्रमे व्यवसायीहे सुरक्षित वातावरण सिर्जना कैना, युवा ओ महिला उद्यमशीलताहे प्राथमिकता डेना तथा जिल्लाके सक्कु नगर उद्योग वाणिज्य संघसँग सहकार्य करटी नेतृत्वकारी भूमिका निर्वाह कैना अठोट व्यक्त करले बा ।
कार्यक्रममे सहभागी व्यवसायी तथा सरोकारवालासे घोषणापत्रहे व्यवसायमैत्री, समय सान्दर्भिक ओ व्यावहारिक प्रतिबद्धता हुइल कहटी स्वागत करले रहिट ।