जेन–जी आन्दोलनसे सुदूरपश्चिम जरल

पहुरा समाचारदाता
धनगढी, २५ भदौ । जेन–जी पुस्ताके मंगरके रोज हुइल आन्दोलनमे प्रदर्शनकारीहुक्रे सुदूरपश्चिम प्रदेशके अधिकाँन्स मन्त्रालय, सरकारी कार्यालय ओ स्थानीय तहमे आगी लगाके ध्वस्त बनैले बटै ।

प्रदर्शनकारीहुक्रे मुख्यमन्त्री कार्यालय, प्रदेश सभा सचिवालय, आन्तरिक मामिला तथा कानून मन्त्रालय, सामाजिक विकास मन्त्रालय, भूमि व्यवस्था तथा कृषि मन्त्रालय, सहरी विकास तथा भवन कार्यालय, मालपोत कार्यालय, नापी कार्यालय, सीटीईभीटी प्रदेश कार्यालय, जिल्ला प्रशासन कार्यालय, भन्सार कार्यालय, यातायात कार्यालय, जिल्ला डिभिजन वन कार्यालय लगायतके भवनमे आक्रमण करके आगजनी ओ तोडफोड करले बटै । प्रदर्शनकारीहुक्रे स्थानीय तह, जनप्रतिनिधिहुकनके घरमेफे आगजानी करले बटै ।

सरकारी गाडीफे जरैलै
प्रदर्शनकारीहुेक्रे धनगढीमे टेम्पल रिसोर्टो पार्किङ मरमे धारल आधा दर्जन सरकारी गाडीमेफे आगजनी करल बा ।

प्रदर्शनकारीहुक्रे सुदूरपश्चिम प्रदेश सभा सचिवालयके भवने प्रवेश करके वहाँ धारल मोटरसाइकल, फर्निचर लगायतके सामान जरैले रहिट ।

स्थानीय तहके संरचनाोफे आगजानी

कैलालीके स्थानीय तह गोेदावरी नगरपालिका, गौरीगंगा, लम्कीचुहा नगरपालिका, कैलारी गाउँपालिकामे समेत आगजनी करल बा । स्थानीय स्तरके महत्वपूर्ण कागजात, सेवा प्रवाहके उपकरण ओ सामग्री जरके नष्ट हुइल बा ।

प्रदर्शनकारीहुक्रे पुर्व प्रधानमन्त्री एवं नेपाली कांग्रेसके सभापति शेर बहादुर देउवाके धनगढी स्थित निवास, सुदूरपश्चिमके प्रमुख दलके नेता, नेकपा एमालेके सुदूरपश्चिम प्रदेश ईन्चार्ज लेखराज भट्ट, निवर्तमान गृहमन्त्री रमेश लेखक, सुदूरपश्चिमका पूर्व मुख्यमन्त्री राजेन्द्र सिंह रावल, नागरिक उन्मुक्ति पार्टीके संरक्षक रेशमलाल चौधरी, कैलारी गाउँपालिकाके अध्यक्ष राजसमझ चौधरी, उपाध्यक्ष भगवतीकुमारी चौधरी, गोदावरीके मेयर वीरेन्द्र भट्ट, पूर्व मेयर हरि सिंह साउँद, गोदावरीके वडा नम्बर २ के वडा सदस्य देव राज भट्ट, नेपाली काँग्रेस कैलाली क्षेत्र नम्बर ४ के सभापति वसन्त रोकाया लगायतके घरमे आगजनी ओ तोडफोड करले बटै । ओस्टेक कैलालीमे नेपाली कांग्रेस, नेकपा एमाले ओ नेकपा माओवादीके पार्टी कार्यालयमेफे आगजनी ओ तोडफोड करल बा ।