ज्योति आयल स्टोरके सञ्चालक ठाकुरसे कैलारी गापाहे एक थान डेस्कटप कम्प्युटर सहयोग
पहुरा समाचारदाता
धनगढी, २९ भदौ । ज्योति आयल स्टोरके सञ्चालक जय ठाकुरसे कैलारी गाउँपालिकाहे एक थान डेस्कटप कम्प्युटर सहयोग करले बटै ।
गैल भदौ २४ गते जेनजी आन्दोलनके नाउँमे प्रदर्शकारीसे गाउँपालिकाके सरसमान तोडफोड ओ आगजानी करलके ध्वस्त बनाइलपाछे गाउँपालिकाहे कामकाजमे सहजता होए कहिके ज्योति आयल स्टोरके सञ्चालक जय ठाकुरसे कैलारी गाउँपालिकाहे एक थान डेस्कटप कम्प्युटर सहयोग करल हुइट ।
अँटवारके ज्योति आयल स्टोरके सञ्चालक ठाकुरसे गाउँपालिका अध्यक्ष राजसमझ चौधरीहे एक थान डेस्कटप कम्प्युटर हस्तान्रण करल रहिट । हस्तान्तरण करेबेर प्रमुख प्रशासकीय अधिकृत खगेन्द्रराज जोशी, सामाजिक विकास शाखा प्रमुख यगम कलेल ओ वडा नम्बर ३ के वडा अध्यक्ष सन्तराम चौधरीलगायतहे उपस्थिति रहे ।
गैल भदौ २४ गते जेनजी आन्दोलनकारीके नाउँमे सार्वजनिक सम्पति गाउँपालिकाके कार्यालयके मुख्य–मुख्य शाखाके महत्वपूर्ण कागजात, सरसमान, सक्कु वडा कार्यालयके सक्कु सामान तोडफोड ओ आगजानी करके ध्वस्त बनैले बटै । पालिकाके महत्वपूर्ण कागजात निकारके आगजानी करलपाछे सेवा प्रवाहमे समस्या आइल बा ।
गाउँपालिका अध्यक्ष राजसमझ चौधरी, उपाध्यक्ष भगवतीकुमारी चौधरीके नीजि घरके सरसामानफे तोडफोड ओ आगजानी करल बा । प्रदर्शनकारीहुक्रे पालिकामे धारल एक ठो स्कुटी ओ दुई ठो मोटरसाइकलफे जरैले बटै ।
अँटवारके रोज कार्यपालिकाके बैठक बैठके जेनजी आन्दोलनके क्रममे सहदात प्राप्त हुइल हुकन शहिद घोषणा करेपर्ना, ओइनके परिवारहे राहत उपलब्ध कराईपर्ना, घाहिलहुकनके निशुल्क उपचारके व्यवस्था करेपर्ना, सार्वजनिक तथा निजि सम्पतिमे तोडफोड ओ आगजानी करुइयाके पहिचान करके कार्वाहीके लाग नेपाल सरकारसे आग्रह कैना निर्णय कैगिल बा ।
गाउँपालिकाके कार्यालयके मुख्य–मुख्य शाखाके महत्वपूर्ण कागजात, सरसमान, सक्कु वडा कार्यालयके सक्कु सामान तोडफोड ओ आगजानी हुइलपाछे सेवा सुचारु हुइना कुछ दिन लग्ना ओ वडा कार्यालयसे प्रदान कैना सेवा पालिकासे डेना निर्णय हुइल हुइल सूचना अधिकारी यगम कलेल जनैलै ।
