प्रशासन, अदालत ओ भन्सार कार्यालयसे सेवा सुचारु

पहुरा समाचारदाता
धनगढी, २९ भदौ । जिल्ला प्रशासन कार्यालय कैलाली, जिल्ला अदालत ओ भन्सार कार्यालय कैलालीसे अँँटवारके रोजसे सेवा सुरु कैगिल बा ।

जिल्ला प्रशासन कार्यालयसे कर्मचारीके ल्यापटप ओ धनगढीके एरिष्टो स्कुलसे कम्प्युटर सहयोग करलपाछे अँटवारके रोजसे प्रशासन कार्यालयसे सेवा सुरु करल हो ।

कार्यालयके प्रमुख प्रशासकीय अधिकृत तथा सूचना अधिकारी शिवराज जोशी अनुसार अब्बेसम नयाँ नागरिकता सिफारिसके लाग सेवाग्राही प्रशासन अइटी रहल बटै ।

गैल २४ गते जेनजी पुस्ताके विरोधसंगे प्रदर्शनकारीसे जिल्ला प्रशासन कार्यालयसे मुख्य प्रशासनिक ओ राष्ट्रिय परिचयपत्र बनाइक लाग प्रयोग करटी आइल भवनमे तोरफोड ओ आगजानी करलपाछे कार्यालय ध्वस्त हुइल बा । कार्यालयके सक्कु समान जरके भुवा बनल बा । शनिच्चरके रोज सरसफाई करलपाछे अँटवारसे सेवा सुचारु करल सूचना अधिकारी जोशी बटैलै ।

ओस्टेक करके गैल २४ गते जेनजी पुस्ताके विरोधसंगे प्रदर्शनकारीसे आगजानीसे ध्वस्त हुइलपाछे जिल्ला भन्सार कार्यालय कैलाली लग्गे रहल गाडी बनैना ग्यारेजसे सेवा डेहे सुरु करल भन्सार कार्यालय कार्यालयके प्रमुख खिम प्रसाद अर्याल जनैलै ।
ओस्टेक करके कैलाली जिल्ला अदालतके अँटवारके आकस्मिक पूर्ण बैठकसे जेन्जी आन्दोलनके क्रममे गैल २४ गते यी अदालतमे हुइल आगजनी, तोडफोड ओ लुटपाट समेतसे यी अदालतमे हुई गैल भौतिक क्षति तथा उ पश्चात उत्पन्न परिस्थितिहे मध्यनजर करके अदालतसे कुछ–कुछ सेवा प्रवाह करल जनागिल बा ।

कैलाली जिल्ला अदालतके श्रेष्तेदार चेतराज पन्तके अनुसार अँटवारके रोजसे बन्दी प्रत्यक्षीकरणके निवेदन दर्ता, म्याद थप, जरुरी पक्राउ पूर्जीके स्वीकृति ओ पक्राउ अनुमति सम्बन्धी कार्य सुचारु कैना निर्णय हुइल जनैलै । उप्पर उल्लेखित बाहेक अदालतसे प्रवाह हुइना मुद्दा दर्ता, नियमित पेसीके मुद्दा सुनुवाई ओ तारिख लगायतके नियमित कामकारवाही दुसर सूचना नैहुइटसमके लाग हालहे स्थगन करल उहाँ जनैलै ।

भदौ २४ गतेसे अदालतमे उपस्थित हुई नैसेक्के गुज्रे गैल म्याद÷तारिख मुलुकी फौजदारी कार्यविधि संहिता, २०७४ के दफा ५९ ओ मुलुकी देवानी कार्यविधि संहिता, २०७४ के दफा २२५ तथा सम्मानित सर्वोच्च अदालतके बृहत पूर्ण ईजलाससे ०७६–आरइ–०३९२ के निवेदनमे हुइल आदेश समेतके आधारमे अदालतके काम कारवाही सुचारु हुइल मितिसे डगरके म्यादबाहेक ३० (तीस) दिनभिटर यी अदालतमे उपस्थित हुके म्याद÷तारेख थाम्न थमाई सेक्ना उहाँ बटैलै । नियमित सेवा सञ्चालनके सम्बन्धमे आवश्यक व्यवस्थापन करके दुसर सूचना जारी कैना श्रेष्तेदार पन्त बटैलै ।

प्रदेशके राजधानी समेत रहल धनगढीमे रहल प्रदेश सरकार मातहतके सक्कु कार्यालय, कैलालीके सरकारी संरचना ध्वस्त पारल बा । प्रदर्शनके क्रममे नेपाल टेलिकम, विद्युत प्राविधिकरण, स्वास्थ्य कार्यालय, सेती प्रादेशिक अस्पताल, धनगढी उपमहानगरपालिका, पशु ओ कृषि कार्याल तथा नेपाल प्रहरीके बाहेक सक्कु जैसिन कार्यालयमे प्रदर्शनकारीसे आगजनी ओ तोडफोड करल जिल्ला प्रशासन कार्यालय कैलाली जनैले बा ।