लोकतन्त्र विरोधी तत्वसे देउवा ओ आरजुउप्पर आक्रमण करलै
पहुरा समाचारदाता
धनगढी, ३० भदौ । नेपाल कांग्रेस सुदूरपश्चिम प्रदेश संसदीय दलसे जेनजी आन्दोलनके क्रममे हुइल हिंसात्मक घटनामे संलग्नहे कारवाहीके दायरामे ल्यन्ना माग करले बा ।
मुख्यमन्त्री समेत रहल कांग्रेस संसदीय दलके नेता कमलबहादुर शाहके अध्यक्षतामे बैठल बैठकसे घटनाबारे पाँच बुँदे निर्णय करटी एकता, पुनर्निर्माण ओ जिम्मेवार कदम चल्न समेत सरकारसँग आग्रह करले बा ।
बैठकसे भदौ २३ ओ २४ गतेके घटनामे ज्यान गुमाइल नागरिक, प्रहरी तथा युवाप्रति श्रद्धाञ्जली अर्पण करटी परिवारजनमे गहिर समवेदना व्यक्त करले बा ।
घाहिलके शिघ्र स्वास्थ्यलाभकेफे कामना करल बा । बैठक नेपाली कांग्रेसके सभापति एवं पूर्व प्रधानमन्त्री शेरबहादुर देउवा ओ नेतृ डा. आरजु राणा देउवा उप्पर हुइल सांघातिक आक्रमणहे लोकतन्त्र विरोधी तत्वके घुसपैठ हुइल कहटी घोर भत्र्सना करले बा । साथे दोषीउप्पर कडा कारबाही कैना माग करल बा ।
ओस्टेक, भदौ २३ ओ २४ गते देशके टमान स्थानमे हुइल हत्या, हिंसा, लुटपाट, आगजनी ओ तोडफोडके घटनामे संलग्नहे छानबिन करके कडा कानुनी कारवाही कैना प्रदेश तथा संघीय सरकारहे अनुरोध करल बा ।
बैठकसे जेनजी ओ युवासे उठाइल भ्रष्टाचारमुक्त समाज निर्माण, भ्रष्टाचारविरुद्ध कारबाहीलगायतके उचित मागहे सम्बोधन कैना तत्काल पहल कैना सरकारहे आग्रह करले बा । देशके वर्तमान अवस्थाहे गम्भीर कहटी एकजुट हुके पुनःनिर्माणके कार्यमे जुटे सक्कुहे अपिल समेत करल बा ।
बैठकसे करल निर्णय
१. यिहे मिति २०८२ साल भदौ २३ ओ २४ गते जेनजीके प्रदर्शनमे ज्यान गुमाइल देशके होनाहार युवा, नागरीक तथा प्रहरीप्रति हार्दिक श्रद्धान्जली व्यक्त करटी परिवारजनमे गहिर समवेदना व्यक्त करटी साथे उ क्रममे घाहिल हुइना सक्कुहुनके शिघ्र स्वास्थ्यलाभके कामना करटी ।
२. लोकतन्त्रके लाग जीवनभर अविचलित रहिके संघर्ष करल पुर्व–प्रधानमन्त्री नेपाली कांग्रेसके आदरणिय पार्टी सभापति शेर बहादुर देउवा ओ नेपाली कांग्रेसके नेता एवं केन्द्रीय सदस्य तथा पुर्व–परराष्ट्रमन्त्री मा. डा. आरजु राणा देउवा उप्पर जेनजीके उ प्रदर्शनमे लोकतन्त्र नचहना, संविधान विरोधी ओ नेपाली कांग्रेसहे कमजोर डेखाई चाहन व्यक्ती, समुहके घुसपैठसे हुइल सांघातिक आक्रमण निन्दनीय रहल ओरस उ कार्यके घोर भत्सर्ना करटी साथे उहाँहुकनके शिघ्र स्वास्थ्यलाभके कामना सहित सांघातिक आक्रमणमे संलग्न दोषीहे कडा कारवाहीके माग करटी ।
३. भदौ २३ ओ १४ गते देशके टमान स्थानमे हुइल हत्या, हिंसा, आक्रमण लुटपाट आगजनी ओ सम्पतिके तोडफोड तथा नोक्सानीके छानबिन करके तत्काल दोषीहे कडा कानूनी कारवाहीके निम्ति प्रदेश सरकार ओ संघीय सरकारहे अनुरोध करटी ।
४. जेनजी ओ यूवाहुक्रे उठाइल भष्ट्राचार मुक्त समाज, भष्ट्राचारीहे कारवाही लगाएतके उचित मागके सम्वोधनके निम्ति तत्काल पहल कैना प्रदेश सरकार ओ संघीय सरकारहे अनुरोध करटी ।
५. भदौ २३ ओ २४ गतेके घटनाहे सृजित मुलुकके वर्तमान अवस्थामे एकजुट हुके पुनः निर्माणके कार्यमे जुटन सक्कुहुनहे हार्दिक अपिल करटी ।
सोम्मार बैठल नेपाल कांग्रेस सुदूरपश्चिम प्रदेश संसदीय दलके बैठकसे करल निर्णय हुइट । मुख्यमन्त्री समेत रहल संसदीय दलके नेता कमलबहादुर शाहके अध्यक्षतामे बैठक बैठल रहे ।
