सहिदके सम्झनामे धनगढीमे ‘जेनजी मार्ग’ नामाकरणके प्रस्ताव

पहुरा समाचारदाता
धनगढी, १ कुवाँर । धनगढी उपमहानगरपालिकासे भदौ २३ ओ २४ गतेके आन्दोलनमे सहादत प्राप्त करल सहिदके सम्झनामे एक महत्वपूर्ण सडक खण्डहे ‘जेनजी मार्ग’ नामाकरण कैना जनैले बा ।

उपमहानगरपालिका वडा नम्बर १ अन्तर्गत जोशी मेडिकल चोकसे पार्क मोड, कबर्ड हल हुइटी सहिद गेट–क्याम्पस रोड छुन सडक (महिला उद्यम बजार सञ्चालन हुइटी रहल क्षेत्र) हे ‘जेनजी मार्ग’ नामाकरण कैना कार्यपालिका बैठकमे प्रस्ताव लैजैना तयारी हुइल बा ।

उपमहानगर प्रमुख गोपाल हमाल जेनजी आन्दोलनमे बलिदान डेहुइया सहिदके सम्झना केवल इतिहासके पानामे केल्ह सीमित नैहुके हरेक युवाके मुटुमे डिया बनके बरटी रना बटैलै । “न्याय, अधिकार ओ परिवर्तनके लाग अपन अमूल्य जीवन समर्पण करुइयाहुक्रे सक्कुहुनके लाग प्रेरणाके ज्योति बनके सदा चम्कटी रहिही,” मेयर हमाल कहलै ।

उहाँ सहिदहुकनके त्याग ओ योगदानहे सम्मानस्वरूप उ सडकहे ‘जेनजी मार्ग’ नामाकरण कैना प्रस्ताव कार्यपालिका बैठकमे प्रस्तुत कैना जानकारी डेलै । साथे उहाँ सक्कु नगरवासीहे उ सडकहे ‘जेनजी मार्ग’ नामले प्रयोग कैना अपील करलै ।