गोदावरीहे सामुदायिक वनसे तीन सेट कम्प्युटर सहयोग
पहुरा समाचारदाता
धनगढी, २ कुवाँर । जेन–जी आन्दोलनके कारण भारी क्षति हुइल गोदावरी नगरपालिका सामान्य सेवा सञ्चालनमे कठिनाइ भोग्टी रहल अवस्थामे गोदावरी सामुदायिक वन उपभोक्ता समितिसे सहयोग पुगैले बा ।
नगरपालिका वडा नं. ४ अन्तर्गतके समितिसे २ लाख ८५ हजार बराबरके ३ थान डेस्कटप कम्प्युटर ओ ३ थान प्रिन्टर हस्तान्तरण करल हो । समितिके अध्यक्ष दिलबहादुर मडै यी सहयोगसे नगरपालिकाके दैनिक सेवा प्रवाहहे सहज बनैना मद्दत कैना विश्वास करल बा ।
सामग्री हस्तान्तरण कार्यक्रम नगर प्रमुख बिरेन्द्र भट्ट ओ प्रमुख प्रशासकीय अधिकृत धर्मराज विनाडीके उपस्थितिमे सम्पन्न हुइल रहे । नगर प्रमुख भट्ट सामुदायिक वन उपभोक्ता समितिहे हार्दिक धन्यवाद व्यक्त करटी संकटके घडीमे करल यी सहयोग प्रशंसनीय रहल बटैलै ।
नगरपालिकासे सक्कुहुनहे सहयोगके लाग आह्वान करटी, इच्छुकसे बैंक खाता वा क्यूआरके माध्यममार्फत रकम, वा आवश्यक सामग्री उपलब्ध कराई सेक्ना जानकारी डेहल बा । सामुदायिक वनके सक्रियतासे गोदावरी नगरपालिकाके सेवामे नयाँ ऊर्जा ठप्न अपेक्षा करल बा ।
