चैतन्यसे जिल्ला प्रशासन ओ गौरीगंगाहे सहयोग
पहुरा समाचारदाता
धनगढी, २ क्ुवाँर । धनगढी उपमहानगरपालिका–५ शिवनगरमे रहल चैतन्य पाठशालासे जिल्ला प्रशासन कार्यालय कैलाली ओ गौरीगंगा नगरपालिकाहे सहयोग करले बा ।
जेन–जी प्रदर्शनकारीहुक्रे ध्वस्त बनाइल जिल्ला प्रशासन कार्यालय ओ गौरीगंगा नगरपालिकाहे सेवा प्रवाहमे समस्या हुइल ओरसे अति आवश्यक कम्प्युटर ओ टेबल सहयोग करल हो ।
पाठशालासे विफेक रोज जिल्ला प्रशासन कार्यालय कैलालीहे सहयोग स्वरुप तीन सेट कम्प्यूटर ओ दुई ठो टेबल हस्तान्तरण रहे । चैतन्य ग्रुप अफ कम्पनीक सिइओ गणेश प्रसाद जोशी, चैतन्य पाठशालाके पिटिए अध्यक्ष ईश्वर गिरी, सुदूरपश्चिम प्रदेश सरकारक स्वास्थ्य दूत दीपक उपाध्याय नेपालसे उ कम्प्यूटर ओ टेबुल प्रमुख जिल्ला अधिकारी कृष्ण प्रसाद लम्सालहे हस्तान्तरण करल रहिट ।
ओस्टेक जेन जी आन्दोलनके क्रममे कैलालीके गौरीगङ्गा नगरपालिकामे टमान सार्वजनिक सम्पत्ति, कार्यालय ओ कार्यालयमे रहल उपकरणमे क्षति पुगल अवस्थाहे मध्यनजर करटी चैतन्य पाठशालासे एक थान प्रिन्टर सहयोग करले बा ।
आन्दोलनके क्रममे आक्रोशित भीडसे नगरपालिकाके कार्यालयमे आगजनी करल रहे ।
आगलागीके कारण नगरपालिका क्षतिग्रस्त बनलपाछे तत्कालीन राहत तथा पुनर्निर्माणमे हातेमालो कैना उद्देश्यसे विद्यालयसे सहयोग करल हो । राहत सामग्री ओ सहयोग रकम विद्यालयके प्रतिनिधिहुक्रे एक गौरीगङ्गा नगरपालिकाके प्रमुख प्रशासकीय अधिकृतहे हस्तान्तरण करल हुइट ।
“चैतन्य पाठशालासे सदा सामाजिक उत्तरदायित्वहे प्राथमिकतामे रख्टी आइल ओ विद्यार्थीहे केवल पाठ्यपुस्तक ओ परीक्षा केन्द्रित ज्ञान ेना केल्ह नाही, समाजमे आवश्यक परल बेला योगदान कैना प्रेरित करटी आइलमे अपनहे खुसी लागल गौरीगङ्गा नगरपालिकाके प्रमुख प्रशासकीय अधिकृत रामबहादुर केसी बटैलै ।
उहाँ कहलै, “आन्दोलनके कारण हमार नगरपालिकामे डेखल क्षति तत्काल मर्मत ओ व्यवस्थापन कैना कठिनाइ हुइटी रहल बा । यैसिन संवेदनशील समयमे चैतन्य पाठशालासे करल सहयोगसे नगरपालिकाहे राहत केल्ह नाही, यी समाजहे जोरना एक ठो सकारात्मक सन्देशफे हो ।”नगर प्रमुख विद्यालयप्रति आभार व्यक्त करटी अइना दिनमे अन्य संस्था ओ सङ्घ–संस्थासेफे यैसिक सहयोगके हात आघे बह्रैना विश्वास व्यक्त करलै ।
चैतन्य पाठशालासे यी आघे यी आघेफे टमान विपद्, महामारी तथा सामाजिक अभियानमे सहयोग करटी आइल बा । विद्यालय प्रशासनसे अबके दिनमेफे जहाँ आवश्यकता परठ, वहाँ योगदान कैना प्रतिबद्धता जनैले बा । जेन्जी आन्दोलनसे देशभर टमान चुनौती ओ क्षति बोक्के आइल हुइलेसेफे चैतन्य पाठशालाके यी कदमसे समुदायहे सहकार्य ओ सहअस्तित्वके सन्देश डेहल बा । समाज ओ राष्ट्र निर्माणमे शैक्षिक संस्थाके भूमिकाहे उजागर कैना यी उदाहरणीय कार्यसे अन्य विद्यालय ओ संस्था समेतहे प्रेरित कैना विश्वास करल बा ।
ओस्टेक सामाजिक उत्तरदायित्व अन्तरगत सुन्दर सुदुरपश्चिम यातायात प्रालिसे जिल्ला प्रशासन कार्यालय कैलालीहे १५ थान सिलिङ पंखा हस्तान्तरण करले बा ।
प्रालिके अध्यक्ष पदमराज सापकोटासे जिल्ला प्रशासन कार्यालय कैलालीके प्रशासकीय अधिकृत शिवराज जोशीहे पंखा हस्तान्तण करल रहिट ।
गोदावरीहे सामुदायिक वनसे तीन सेट कम्प्युटर सहयोग
जेन–जी आन्दोलनके कारण भारी क्षति हुइल गोदावरी नगरपालिका सामान्य सेवा सञ्चालनमे कठिनाइ भोग्टी रहल अवस्थामे गोदावरी सामुदायिक वन उपभोक्ता समितिसे सहयोग पुगैले बा ।
नगरपालिका वडा नं. ४ अन्तर्गतके समितिसे २ लाख ८५ हजार बराबरके ३ थान डेस्कटप कम्प्युटर ओ ३ थान प्रिन्टर हस्तान्तरण करल हो । समितिके अध्यक्ष दिलबहादुर मडै यी सहयोगसे नगरपालिकाके दैनिक सेवा प्रवाहहे सहज बनैना मद्दत कैना विश्वास करल बा ।
सामग्री हस्तान्तरण कार्यक्रम नगर प्रमुख बिरेन्द्र भट्ट ओ प्रमुख प्रशासकीय अधिकृत धर्मराज विनाडीके उपस्थितिमे सम्पन्न हुइल रहे । नगर प्रमुख भट्ट सामुदायिक वन उपभोक्ता समितिहे हार्दिक धन्यवाद व्यक्त करटी संकटके घडीमे करल यी सहयोग प्रशंसनीय रहल बटैलै ।
नगरपालिकासे सक्कुहुनहे सहयोगके लाग आह्वान करटी, इच्छुकसे बैंक खाता वा क्यूआरके माध्यममार्फत रकम, वा आवश्यक सामग्री उपलब्ध कराई सेक्ना जानकारी डेहल बा । सामुदायिक वनके सक्रियतासे गोदावरी नगरपालिकाके सेवामे नयाँ ऊर्जा ठप्न अपेक्षा करल बा ।
सुनचाँदी व्यवसायी संघसे प्रशासन ओ मालपोतहे सहयोग
सुनचाँदी व्यवसायी संघ कैलालीसे जिल्ला प्रशासन कार्यालय ओ मालपोत कार्यालयहे विफेक रोज आवश्यक सामाग्री सहयोग सहयोग करले बा ।
सुनचाँदी व्यवसायी संघ कैलालीके अध्यक्ष यदु सुनार कार्यालयहे आवश्यक पर्ना सामाग्री (कुर्ची) जिल्ला प्रशासन कार्यालय कैलालीके सहायक प्रमुख जिल्ला अधिकारी किरण जोशीहे हस्तान्तरण करलै ।
ओस्टेक करके सुनचाँदी व्यवसायी संघ कैलालीसे जिल्ला मालपोत कार्यालय कैलालीहे विद्युतीय सामाग्री सहयोग करले बा । भदौ २४ गते जेनजी समूहसे हुइल प्रदर्शनसे कार्यालयमे आगजनी तथा तोडफोड हुइल रहे ।
कामकाज ठप्प हुइल कार्यालयके दैनिक काममे सहज, हाली होए कहिके सुनचाँदी व्यवसायी संघसे सरकारी कार्यालयहे सहयोग करल अध्यक्ष सुनार बटैलै । अध्यक्ष सुनारसे आम नागरिकहे आगजनी तथा तोडफोडसे क्षतिग्रत हुइल कार्यालय संघसंस्थाहे सहयोगके लाग अपिल करले बटै ।
सामाग्री हस्तान्तरण कार्यक्रममे सुनचाँदी व्यवसायी संघ कैलालीके पदाधिकारी ओ व्यवसायीहुकनके उपस्थिति रहे ।
कुछ दिन आघे संघके पदाधिकारीहुक्रे जेनजी समूहसे तोडफोड तथा आगजनी करल आन्तरिक राजस्व कार्यालय धनगढीके भवन तथा कार्यालय परिसरमे सरसरफाई करल रहे ।
