कैलाली अस्पतालसे डा. अकाश राउतके फेन सेवा

पहुरा समाचारदाता
धनगढी, ३१ कुवाँर । धनगढीस्थित कैलाली अस्पतालमे आब फिजिसियन डा. अकाश राउत फेन सेवा डेहे लागल बटै ।

मधुमेह, थाइराइड, पेट, मुटु तथा छाती, कलेजो, हेपाटाइटिस, ब्लडप्रेसर ओ मोटोपनजैसिन समस्या हेर्ना डा. राउत सेवा सुरु करल हुइट । डा. राउतके अनुसार, सर्वसाधारणके स्वास्थ्यहे ध्यानमे राखके आगामी १५ दिनसम निःशुल्क ओपीडी सेवा प्रदान करजैना बा । उ अवधिमे बिरामी सामान्य जाँच तथा परामर्श निःशुल्क पैना बटै ।

१२ बरससे सेवा डेटी आइल कैलाली अस्पताल धनगढी उपमहानगरपालिका–१, पशुपतिटोलमे अवस्थित रहल बा । आधुनिक उपकरण ओ दक्ष चिकित्सकहुक्रनके टिममार्फत अस्पताल पाछेक बरसमे सेवा दायरा विस्तार कैटी आइल बा ।

अस्पतालके अध्यक्ष जनक राज जोशीके अनुसार, हाल अस्पतालमे १५ जाने बिशेषज्ञ चिकित्सक कार्यरत रहल बटै ओ टमान रोगके लाग अत्याधुनिक सेवा सञ्चालनमे रहल बटै । उहाँ कहलै, “हम्रे हरेक बरस सेवाके गुणस्तरमे सुधार कैटी आइल बटी । डा. अकाश राउत जैसिन दक्ष फिजिसियनके आगमनसे यहाँके स्वास्थ्य सेवा आउर सुदृढ बन्ना बा ।”

कैलाली अस्पतालसे हाल आन्तरिक चिकित्सा, हाडजोर्नी, रेडियोलोजी, ल्याब सेवा लगायतके शाखासे सेवा प्रदान कैटी आइल बा । डा. राउतके १५ दिन निःशुल्क सेवा सुरु हुइलसँगे धनगढी तथा आसपासके बिरामीहे उपचारके लाग थप सहजता हुइना अपेक्षा करल बा ।