छोट उद्यमीके लाग उद्यमशिलता सचेतना अभिमुखीकरण

पहुरा समाचारदाता
धनगढी, १ कार्तिक । कैलारी गाउँपालिकाके छोट उद्यमीहुकनके लाग एक दिने उद्यमशिलता सचेतना अभिमुखीकरण कार्यक्रम सम्पन्न हुइल बा ।

सामुदायिक विकास केन्द्र (सिडिसी) डोटीके आयोजना तथा यूनिसेफके सहयोग ओ कैलारी गाउँपालिकाके समन्वयमे किशोरी सशक्तकीकरण परियोजना अन्र्तगत छोट उद्यमीहुकनके लाग उद्यमशिलता सचेतना अभिमुखीकरण कार्यक्रम करल हो ।

उद्यमीहुकनहे उद्यमीशिलता सम्बन्धी ज्ञान, सीप ओ सोच विकास करैना, सहभागिताहुकनहे स्थानीय व्यवसायिक अवसर पहिचान, व्यवसाय सामान्य योजना तयार कैना ओ आर्थिक व्यवस्थापनमे आधारभूत ज्ञान डेहक लाग अभिमुखीकरण कार्यक्रम संचालन करल सामुदायिक विकास केन्द्र (सिडिसी) डोटीके कार्यक्रम संयोजक तिलक चौधरी बटैलै ।

कैलारी गाउँपालिका उपाध्यक्ष भगवतीकुमारी चौधरीके विशिष्ट आतिथ्यतामे हुइल कार्यक्रममे उहाँ उद्यम छोट छोट पुँजीमे करेसेक्ना बटैली ।

व्यवसाय कैना उद्यमी बन्ना भारी पुँजी नाही, इच्छाशक्ति हुइलेसे छोट पुँजीसे सुरुवाट करके उहीहे आवश्यकता ओ मागके आधारमे विस्तारे भारी बनैटी लैजाई सेक्ना बटैटी लैजाई सेक्ना उहाँ बटैली ।

गाउँपालिकासे वेरोजगार यूवाहुकनहे स्थानीयस्तरमे रोजगार बनैटी टमान मेरिक तालिम सञ्चालन करके सीपसँगे आयआर्जन बढैना कार्यक्रम सञ्चालन करल बटैली ।

सामुदायिक विकास केन्द्र (सिडिसी) डोटीके कार्यकारी निर्देशक हेमराज जोशी छोट लगानीसे सञ्चालन हुइल उद्यमी फस्टैटी गैल डेखल बटैली । छोट लगानीके व्यवसाय जोखिम कम रहल ओ जटरा मेहनेत ओटरे मजा बनाई सेक्ना बटैलै ।

सामुदायिक विकास केन्द्र (सिडिसी) डोटीके कार्यक्रम अधिकृत करुणा चौधरी यूनिसेफके सहयोगमे कैलारी गाउँपालिकाके टमान वडाके १५ जाने परिवारहे छोट उद्यम संचालनके लाग आर्थिक सहयोग करल बटैली ।

जेम्ने रुपान्तरण कक्षा लेके रहल बाल संरक्षणके जोखिममे रहल पाँच जाने परिवारहे २० हजारके दरले आयआर्जनमे लगानी करेक लाग सहयोग करल बा । कलेसे अति सीमान्तकृत भिटर पर्ना सामाजिक सुरक्षाके दृष्टिके जोखिममे रहल १० जाने परिवारहे २५ हजारके दरले सहयोग करल उहाँ बटैली । सिडिसीसे सहयोग पाइलपाछे अपनेहुक्रे बाख्रा पालन सुरुवाट करल कैलारी–७ के हरिशंकर चौधरी बटैलै ।

अभिमुखीकरण कार्यक्रममे सहजीकरण तथा प्रशिक्षण दलबहादुर ओली करल रहिट । एक दिने अभिमुखीकरण कार्यक्रममे उद्यमशिता का हो ?, जोखिम ओ जोखिम व्यवस्थापन (वित्तीय सारक्षरता, बचत, बिमा), सफल उद्यमके लाग व्यवसाय योजना परिचय, आर्थिक व्यवस्थापन ओ बजार पहँुचबारे प्रशिक्षण डेहल रहे ।

अभिमुखीकरण कार्यक्रममे सामुदायिक विकास केन्द्र (सिडिसी) डोटीके फाइनन्स अधिकृत चन्दन विक, सामाजिक परिचालक सकुन्तला चौधरीलगायत १६ जानेक सहभागिता रहल रहे ।