अब्बेक पानीसे लाही खेती पछेल्ना किसानहे चिन्ता

पहुरा समाचारदाता
धनगढी, १४ कार्तिक । अब्बे बरसना पानीसे किसानहुकनहे लाही खेती पछेले सेक्ना चिन्ता बह्रल बा ।
देशमे पश्चिमी वायु ओ ‘मोन्था’ चक्रवातके आंशिक प्रभाव परल ओरसे वर्षा हुइटी रहल बा । मोन्था चक्रवातके प्रभाव विफेक रात झन् बह्रना मौसमविद् पूर्वानुमान करले बटै । यी बरस मनसुन ढिला बहिर मने किसानहुकनके धानवाली पहिले तयार हुइल कारण डसिया ओ डेवारीमे किसानहुक्रे धानवाली ओसर्नामे व्यस्त रहलै ।

डेवारीसम धानवाली भिटरासेकलपाछे आलु लगाइक लाग ओ लाही खेतीके खेतवारी तयार हुइल बेला सोम्मारके रातसे बरसटी रहल पानीसे कैलालीमे किसानहुकनहे समस्या हुइल बा ।

कैलारी गाउँपालिका वडा नम्बर ५ के किसान सीताराम चौधरी लाही बोइक लाग खेतवारी तयार मने सोम्मारके रातसे बरसल पानीसे जोटल खेटुवा गिलगिल हुइलपाछे फेरसे जोटे पर्ना अवस्था आइल बटैलै ।
उहाँ कहलै, ‘अब्बे टेक्टर जोटाई महंगा बा । १६ कटठा जग्गा लाही बोइक लाग जोटखोदके तयार हुइल रहे । पानी बरसके गिलगिल करडेहलपाछे दोहरो जोटेपर्ना अवस्था आइल बा ।
जोरसे पानी बरसलेसे भर्खर लगाइल आलु ओ लासुनफे सरना डर रहल उहाँ बटैलै ।

ओस्टेक करके घोडाघोडी–१० लठहियाके श्रवण चौधरीफे टेक्टरसे जोटाइल खेटुवा पानी बरके गिलगिल हुइलपाछे फेरसे जोटेपर्ना अवस्था आइल बटै ।

उहाँहुक्रे जस्टे कैलालीमे हरेक किसानहुक्रे अब्बे लाही बोइलक जग्गा तयारी करटी रहल ओ आलु लगैना तयारी करटी रहल बटै । अब्बे देशमे पश्चिमी वायु ओ ‘मोन्था’ चक्रवातके प्रभावसे भारी बर्षा हुइलेसे लाही खेती पछेल्ना, ओ खेतवारी गिलगिल हुके टिना खेतीफे पछेल्ना विल्गाइल ।

कब सुधार हुई मौसम ?

देशके अधिकांश ठाउँमे वर्षा हुइटी बा । यी वर्ष कार्तिकमे हिमपात ओ भारी वर्षा हुइलपाछे कहु किसानहे चिन्ता, कहु खुशी लागल बा । कलेसे बाढ पहिरोके चिन्ता टे परली बा ।

हाल देशमे पश्चिमी वायु ओ ‘मोन्था’ चक्रवातके आंशिक प्रभाव परल ओरसे वर्षा हुइटी रहल बा । मोन्था चक्रवातके प्रभाव विफेक रात झन् बह्रना मौसमविद्के पूर्वानुमान बा । वरिष्ठ मौसमविद् वरूण पौडेलके अनुसार विफेक रात पानी पर्ना क्रम झन् बह्रना कहले रहिट ।

‘अब्बे हम्रे पुर्वानुमान करल अनुसारके वर्षा ह्ुइटी रहल बा । रात फेर वर्षा बह्री ।’ उहाँ कहलै । यकर प्रभाव कोशी प्रदेशसे लुम्बिनीके पूर्वी भागसम् पर्ना उहाँक कहाई बा । मने, पश्चिमके तुलनामे पूर्वमे ढेर पानी परी ।

यकर साथे वर्षाके असर शुकके दिनभर रना ओ शनिच्चर सकारे क्रमश सुधार हुइटी जैना पूर्वानुमान बा । नेपालके मधेश प्रदेशसे प्रवेश कैना यी प्रणालीसे मध्यमसे भारी वर्षा करैना जल तथा मौसम पूर्वानुमान महाशाखा जनैले बा । उच्च पहाडी ओ हिमाली क्षेत्रमे हिमपातसमेत हुइना सम्भावना बा ।
साथे कोशीके ढेर ठाउँमे मध्यम वर्षा हुइना सम्भावना बा । गण्डकी ओ लुम्बिनी प्रदेशके पहाडी तथा हिमाली क्षेत्रके कुछ ठाउँमे वर्षा ओ हिमपातके सम्भावना बा ।

कर्णाली ओ सुदूरपश्चिम प्रदेशके कुछ ठाउँमे हल्का वर्षा हुइना विभागके पूर्वानुमान बा । महाशाखासे देशके उच्च पहाडी तथा हिमाली भू–भागके कुछ भागमे मध्यम हिमपात हुईसेक्ना जनैले बा ।
अब्बे पदयात्रामे नैजैना ओ सम्भावित बाढ पहिरोके जोखिमसे बँच्ना मौसम पूर्वानुमान महाशाखा सक्कुहुनहे आग्रह करले बा ।