चन्द्रमुखी टलुवामे आन्तरिक पर्यटक आकर्षित
पहुरा समाचारदाता
धनगढी, १९ कार्तिक । कैलालीके धनगढी उपमहानगरपालिका–७ स्थित मनहेरा सामुदायिक वनमे रहल चन्द्रमुखी टलुवामे आन्तरिक पर्यटकसे भरिभराउ हुई लागल बा ।
पर्या पर्यटनके विकास कैना उद्देश्यसे ताल व्यवस्थापनके साथे पर्यटन गतिविधि आघे बढाइलपाछे औपचारिक रुपमे सञ्चालनमे नैअइटी ताल आन्तरिक पर्यटकसे भरिभराउ हुई लागल हो ।
धनगढी–७ देवहरियामे रहल जाखोर ताल घुमफिर ओ पर्यटन गतिविधि सञ्चालनके लाग बन्द करलपाछे ओकर कुछ दूरीमे रहल चन्द्रमुखी टलुवामे दैनिक ढेर मनै पुग्टी रहल बटै । टलुवामे बोटिङ ओ बल्हा (पिङ) सञ्चालन करल बा । बोटिङ, घुमफिर कैना ओ टलुवक बिच भागमे टापु बनाके धारल बल्हा (पिङ)मे रमाइक लाग पर्यटकके चहलपहल हुइना करल बा ।
१.०८ हेक्टर क्षेत्रफल रहल यी टलुवामे पर्या पर्यटन सम्बन्धी गतिविधि सञ्चालनके लाग मनहेरा सामुदायिक वन उपभोक्ता समूहसे वनके उपभोक्ता लोकेन्द्र विष्टहे ठेक्कामे डेहल बा । सामुदायिक वनके भेलासे करल निर्णय अनुसार ठेक्कामे टलुवा डेहल मनहेरा सामुदायिक वन उपभोक्ता समूहके अध्यक्ष एवम् धनगढी उपमहानगरपालिका–७ के वडा अध्यक्ष मोती राना बटैलै ।
“उपभोक्ता मध्येके कोई टलुवामे पर्यटन गतिविधि सञ्चालन करलेसे प्राथमिकताके साथ उहीहे डेना वनके भेलामार्फत निर्णय हुइल रहे”, उहाँ कहलै, “ओकरपाछे मै करम कहिके उपभोक्तामध्येके एक भाइ आघे बह्रलै । हम्रे उहाँहे डेली ।” टलुवाके वारपार ब्लक धारके पद्मार्ग बनैनाके साथे टलुवाके बिच भागमे जाइक लाग पुल निर्माण करल बा ।
राष्ट्रपति चुरे संरक्षण बोर्ड ओ सुदूरपश्चिम प्रदेशके उद्योग, पर्यटन, वन तथा वातावरण मन्त्रालयके प्रदेश पर्यटन विकास कार्यक्रम कार्यान्वयन इकाईसे बजेट माग करके टलुवा बारपार व्यवस्थापन करल अध्यक्ष राना बटैलै ।
“पुल लगायतके और संरचना भर ठेक्का प्राप्त करुइया अपने लगानीमे निर्माण करले बटै, उहाँ कहलै,“लग्गे रहल कारण घुमघाम करुइयाके भीडभाड रहठ ।” सरकारके २० प्रतिशत ओ अपन व्यक्तिगत ८० प्रतिशत लगानीमे व्यवस्थापन ओ संरचना निर्माण करके टलुवामे पर्या पर्यटनके गतिविधि आघे बह्राइल सञ्चालक विष्टके कहाई बा ।
उहाँ आठ महिनासम वन सम्बन्धी ऐन ओ नियमावली अध्ययन करके केल्ह अपने यम्ने हात दारल कहटी कहलै,“अभिन निर्माणाधीन अवस्थामे बा । औपचारिक रुपमे उद्घाटन ह्इल नैहो । टिकट छापल नैहो । उहोर, जाखोर टलुवा बन्द हुइल, मनै यहोर आई लागलपाछे डसियासे मै मै सञ्चालनमे ल्यान्नु ।”
वार्षिक ६० हजार ठेक्का टिरना करके १० वर्षके लाग तालसहित वरपरके कुछ क्षेत्र ठेक्कामे लेहल विष्टके कहाई बा । चन्द्रमुखी ताल घुमफिर करुइया बह्रलपाछे ताल क्षेत्रमे आगन्तुकहुकनके फोटु खिच्ने फोटोग्राफरहुक्रे फे आम्दानी करे लागल बटै । टलुवामे घुमफिर करुइया बह्रटी गैल जनैटी धनगढी उपमहानगरपालिका–७ फोटोग्राफर अरुण चौधरी फोटु खिचके दैनिक तीन हजारसम कमाइ हुइना करल बटैठै । उहाँके अनुसार टलुवा क्षेत्रमे १० जाने फोटोग्राफरसे फोटु खिच्न काम करटी बटै ।
