१० करोड लगानीमे ‘नेचुरा रिसोर्ट’ सञ्चालन
पहुरा समाचारदाता
धनगढी, २१ कार्तिक । धनगढी उपमहानगरपालिका वडा नम्बर ३ गुरुद्वारा मार्गमे १० करोड लगानीमे नेचुरा रिसोर्ट सञ्चालनमे आइल बा ।
धनगढीमे चिकेन स्टेशन सञ्चालन कैटी आइल व्यवसायी मदन भट्ट ‘नेचुरा रिसोर्ट’ सञ्चालनमे लानल हुइट । शुकके कैलाली उद्योग वाणिज्य संघके अध्यक्ष पुस्करराज ओझा रिबन काटके रिसोर्टके उद्घाटन करल हुइट ।
धनगढीमे स्तरीय रेस्टुरेन्ट ओ आवासीय सुविधा डेहक लाग रिसोर्ट सञ्चालनमे लानल व्यवसायी भट्ट बटैलै । उहाँ कर्पोरेट क्षेत्रके पहुनाहुक्रनहे मध्यनजर कैके रिसोर्ट सञ्चालनमे लानल बटैलै ।
रिसोर्टमे रेस्टुरेन्ट, कन्फ्रेन्स हल ओ १७ ठो सुविधा सम्पन्न आवासीय कोठा रहल बावै । जेम्ने आठठो सुपर डिलक्स रुम ओ सातठो डिलक्स रूम रहल व्यवसायी भट्ट बटैलै ।
रिसोर्टमे लज ओ रेस्टुरेन्टके लाग अलग–अलग भवन रहल बावै । ३ करोडके जग्गा ओ सात करोड संरचना निर्माणमे खर्च हुइल भट्ट बटैलै । रिसोर्ट परिसरमे पर्याप्त पार्किङके व्यवस्था रहल बा कलेसे पानीके फोहरा, कृत्रिम झरनासहित टमान प्रजातिके रुख्वा बरिख्वा लगाके हरियाली व्यवस्थापन करल बा ।
जुरार मौसममे घाम टप्टी ओ गर्मीमे रुख्वक छौँहरीमे बैठके प्राकृतिक वातावरणके आनन्द लेटी रमैना मिल्ना मेरके रिसोर्टके संरचना निर्माण करल भट्ट बटैलै ।
पहुना सत्कार क्षेत्रमे सम्भावना डेखके लगानी करल बटैटी भट्ट चिकेन स्टेसन ओ रिसोर्टमे ४० जनहनहे पूर्णकालीन रोजगारी डेले बटै । धनगढीमे सहर लग्गेहे एकान्त स्तरीय सेवा खोजुइया पहुनाहे लक्षित कैके रिसोर्ट सञ्चाचलनमे लानल भट्ट बटैलै ।
’आपन ठाउँमे सम्भावना खोजे परठ् कहिके मै यी क्षेत्रमे लगानी करल हुइटुँ,’ उहाँ कहलै, ’अब्बे प्रत्यक्ष रुपसे ४० जनहनहे रोजगारी डेले बटु, धनगढीमे फेन काठमाडौँके जस्टे रिसोर्ट हुइ परठ् कहिके लगानी करल हुइटु, पृष्ठपोषण मजा अइटी रहल बा ।’
