अपराधिक घटनामे वृद्धि
पहुरा समाचारदाता
धनगढी, २५ कार्तिक । जिल्ला प्रहरी कार्यालय कैलालीके अनुसन्धान शाखासे डेहल तथ्यांक अनुसार कार्तिक ११ गतेसे कार्तिक २२ गतेसम लागु औषध, फरार प्रतिवादी ओ जेनजी आन्दोलनमे भागल कैदीबन्दी कैके ५९ जनहनहे पक्राउ परलै । १२ दिनके तथ्यांक कैल्ह हेरेबेर अपराधिक घटनामे संलग्न ओटरा पक्राउ परल विल्गाइठ ।
जिल्ला प्रहरी कार्यालय कैलालीके प्रवक्ता प्रहरी निरिक्षक कैलाश सिंह विष्टसे डेहल जानकारी अनुसार यी अवधिमे लागु औषधमे संलग्न २५ जनहनहे पक्राउ करके १५ जनहन उप्पर मुद्दा दायर करल जनागिल बा । प्रहरीसे ओइनसंगे ३१ ग्राम १३० मिलिग्राम खैरो हेरोइन बरामद करल जनैले बा ।
उ अवधिमे २१ जाने फरार प्रतिवादीनहे पक्राउ कैगिल बा । ओम्ने चालु मुद्दाके ५ जाने, ओ फैसला कार्यान्वयनके २१ जाने रहल बटै । उ अवधिमे जरिवाना ३ लाख १० हजार १७६ रुप्या संकलन हुइल जनागिल बा ।
ओस्टेक करके कार्तिक ११ गते यहोर जेनजी आन्दोलनमे भागल ९ जाने कैदी ओ ४ जाने बन्दीहुकनहे पक्राउ करल जिल्ला प्रहरी कार्यालय कैलालीके प्रवक्ता विष्ट जनैलै ।
ओस्टेक करके सुदूरपश्चिम प्रदेश प्रहरी कार्यालयसे डेहल तथ्यांक अनुसार कार्तिक २३ गते कैलाली, कञ्चनपुर ओ दार्चुलासे फरार नौ जाने प्रतिवादी पक्राउ परल बटै ।
फैसला कार्यान्वयनके सिलसिलामे जिल्ला अदालत कञ्चनपुरके टमान मितिके फैसलासे कैद सजाय ठहर हुके फरार रहल पाँच जाने पक्राउ करल बा ।
जिल्ला प्रहरी कार्यालय कञ्चनपुरसे खटल प्रहरी टोलीसे लागुऔषध मुद्दामे २ महिना ६ दिन कैद सजाय तोकल जिल्ला कञ्चनपुर, भीमदत्त न.पा. १८ निम्बुखेडा बैठना सुरेन्द्र बहादुर बम, लागुऔषध मुद्दामे ११ महिना कैद सजाय तोकल कञ्चनपुर, बेल्डाडी गा.पा.२ बैठना बर्ष २० के सुमन साँउदहे पक्राउ करले बा ।
लागुऔषध मुद्दामे ६ महिना कैद सजाय तोकल जिल्ला कैलाली, घोडाघोडी न.पा. १० पहलमानपुर बैठना बर्ष २९ के मीनबहादुर कुँवर, लागुऔषध मुद्दामे ६ महिना कैद सजाय तोकल जिल्ला कैलाली, घोडाघोडी न.पा. १० पहलमानपुर बैठना बर्ष २९ के महेश खड्काहे पक्राय करल बा ।
लागुऔषध मुद्दामे ६ महिना कैद सजाय तोकल जिल्ला कैलाली, घोडाघोडी न.पा.१० पहलमानपुर बैठना बर्ष २७ के जगदिश चौधरीहेफे प्रहरी पक्राउ जनागिल बा ।
ओस्टेक करके फैसला कार्यान्वयनके सिलसिलामे जिल्ला अदालत कैलालीके फैसलासे बहुविबाह सम्बन्धी मुद्दामे १ महिना ६ दिन कैद सजाय ओ १० हजार जरिवाना तोकल जिल्ला कैलाली, कैलारी गा.पा.४ के गाउँ बैठना वर्ष ४६ के मिलाल सुनारहे इलाका प्रहरी कार्यालय हसुलिया, कैलालीसे खटल प्रहरी टोलीसे हुकाने घर ठेगानासे पक्राउ करले बा ।
ओस्टेक करके फैसला कार्यान्वयनके सिलसिलामे जिल्ला अदालत दार्चुला ओ जिल्ला प्रशासन कार्यालय दार्चुलाके टमान मितिके फैसलासे कैद सजाय तथा जरिवाना ठहर हुके फरार रहल तीन जनहनहे पक्राउ कैगिल बा ।
जिल्ला प्रहरी कार्यालय दार्चुलासे खटल प्रहरी टोलीसे लागुऔषध मुद्दामे १२ दिन कैद सजाय तोकल दार्चुला, नौगाड गा.पा.वडा नम्वर ०१ ईयरकोट बैठना बर्ष २२ के देवसिह ठगुन्नाहे पक्राउ करल बा ।
लागुऔषध मुद्दामे ३ महिना २८ दिन कैद सजाय ओ रु.२० हजार जरिवाना तोकल दार्चुला, महाकाली न.पा.४ तल्लासैन बैठना बर्ष ५० के मोहन सिह बिष्टहे पक्राउ करल बा ।
जुवा सम्बन्धी कसुरमे १ महिना कैद सजाय ओ जरिवाना रु.३० हजार जरिवाना तोकल दार्चुला, दुहु गा.पा. २ बैठना बर्ष ३४ के जनक वडालहे करल प्रदेश प्रहरी कार्यालय जनैले बा ।
