कैलारीमे सेवा प्रवाह, वर्तमान चुनौती ओ आवश्यकताबारे अन्तरसंवाद

पहुरा समाचारदाता
धनगढी, २७ कार्तिक । कैलारी गाउँपालिकामे सेवा प्रवाह, बर्तमान चुनौती ओ आवश्यकता विषयक अन्तरसंवाद कार्यक्रम हुइल बा ।

गैल भदौ २३ ओ २४ गतेक जेनजी आन्दोलनपाछे कैलारीमे सेवा प्रवाहमे समस्या डेखलपाछे इन्सेक सुदूरपश्चिम प्रदेश कार्यालयके आयोजनामे मानव अधिकार समुह कैलारीके समन्वय ओ डिसिएके सहयोगमे उ संवाद कार्यक्रम कैगिल हो ।

मानव अधिकार समुह कैलारीके संयोजक मानबहादुर चौधरीके अध्यक्षतामे हुइल कार्यक्रममे प्रमुख अतिथि कैलारी गाउँपालिका अध्यक्ष राजसमझ चौधरी रहल रहिट । भदौ २४ गते जेनजी आन्दोलनके नाउँमे सार्वजनिक सम्पति, महत्वपूर्ण कागजात, विगतसे अभिनसमके दस्तावेज जराके नष्ट हुइलपाछे सेवा प्रवाहमे समस्या आइल बटैलै ।

घटनापाछे स्थानीय सरकारसे सेवा प्रवाह डेहे नैसेक्ना अवस्था नैरहे, गाउँपालिका अध्यक्ष कहलै, पालिकाके सम्पति सार्वजनिक सम्पति हो । आर्थिक संकट परल बेला अभिनसम जुटागिल भौतिक सम्पति जराइलपाछे कैलारीहे शु्न्यता सुरु कैना अवस्था आइल बा । पालिकाके भवन हेरेबेर क्षति नैविल्गाइल मने भिटरके महत्व कागजात ओ सामान जरके नष्ट हुइल । वडा कार्यालय ध्वस्त हुइलपाछे फेरसे वडा कार्यालय निर्माण करेपर्ना अवस्था बा ।

घटनापाछे सर्वदलिय बैठकसे निकास निकारेक लाग छलफल हुइलपाछे सदभाव कायम हुइल उहाँ बटैलै । वडा कार्यालय ध्वस्त हुइलेसेफे सेवाग्राहीके माग अनुसार सम्बन्धित वडामे कार्यालय स्थापना करके सेवा प्रदान करल बटैलै ।

किसानहुकनके माग अनुसार धान विक्री डिपो केन्द्र स्थापनाके लाग खाद्यसे बाट करल मने धान खरिद कैना कोटा कम रहल कहटी यी बरस कैलारीमे आइ मन नैकरल उहाँ बटैलै । गाउँपालिकासे शिक्षा, स्वास्थ्य, कृषिलगायत क्षेत्रमे विन समन्वयके काम नैकरल गाउँपालिका अध्यक्ष बटैलै ।

गाउँपालिका उपाध्यक्ष भगवतीकुमारी चौधरी स्थानीय सरकारके सार्वजनिक सम्पति सक्कु जानेक सम्पति रहल कहटी जेनजी आन्दोलनके नाउँमे जराइल सम्पति हमार सक्कु जानेक रहल बटैली । उहाँ कहली, ‘टेबुल, कु्र्सी जरल,फर्निचर जरल मने उ फेरसे किने सेक्ना हो मने हमार दस्तावेज जरल उ हमार विगतके एतिहास हेराइल बा । काम कैना समस्या आइल बा । व्यक्तिगत सम्पति जरलमे दुःख नैलागल मने सार्वजनिक सम्पति जरलमे जनता, सेवाग्राही दुःख पैना काम हुइल बा ।

आन्दोलन केल्ह समस्याके समाधान नैहो, उहाँ कहली, ‘कुहीहे कुछ बाट चित नैबुझल, सेवा पैनामे समस्या हुइल कलेसे पालिकामे आके प्रत्यक्ष बाट करेसेक्जाइठ । संघीय सरकार लिख्ना सरकार हो, प्रदेश सरकार डेख्ना सरकार हो मने स्थानीय सरकार भेटना सरकार हो । चित नैबुझल चिज संवाद करके समाधान करी ।

गाउँपालिकासे यूवा, महिला, सीमान्तकृत समुदायहे लक्षित करके कार्यक्रम तथा योजना संचालन करल उहाँ बटैली ।

कैलारी गाउँपालिका वडा नम्बर ५ के वठा अध्यक्ष विष्णु प्रसाद चौधरी अपनेहुक्रे सुशासनके तुल्स प्रयोग करके सदैव आघे बह्रल बटैलै । उहाँ कहलै, विगतके दिनसे सार्वजनिक सुनुवाई कार्यक्रम करटी आइल बा । गैल बरस वडा वडा कार्यालयके कैगिल रहे ।

जेनजी आन्दोलनके सार्वजनिक सम्पति जरागिलपाछे वडा कार्यालयके सेवा प्रवाहमे समस्या आइल उहाँ बटैलै । उहाँ कहलै, पहिले जौन काम ५÷१० मिनेटमे होए अब्बे उ काम आधा लग्ना करल बा । चाहल इकुपमेन्ट नैहो । वडा कार्यालय शुन्यतासे सुरु करेपरल बा । वडा कार्यालयके जैन सामान बा । जटरा संघसंस्था ओ व्यक्तिके सहयोगसे आइल हो । वडा कार्यालयके अपने भवन ध्वस्त पारलपाछे ठाउँक समस्याफे रहल बा ।

इन्सेक सुदूरपश्चिम प्रदेश संयोजक खडकराज जोशी नागरिक कर्तव्य अनिवार्य रहल बटैलै । कौनो ठाउँमे अनियमितता बा, भ्रष्टाचार, सुशासन कायम नैहो कलेसे खवरदारी कैना ठिक बाट हो, ओकर लाग कानूनफे बा । मने खबरदारीके नाउँमे सार्वजनिक सम्पतिमे तोडफोड आगजानी कैना कानुनके उलंघन हो । गलत क्रियाकलाप संलग्ना सक्कु जाने सजायके भागिदार हुइही ।

कार्यक्रमममे पत्रकार अर्जुन शाह पालिकासे विगत दिन करल कामके मुल्यांकन ओ जेनजी आन्दोलनपाछे बह्रल जनगुनास अनुुसार समन्वय करके आघे बह्रेपर्नालगायत सुझाव डेहल ।

कार्यक्रममे कैलारी–६ के भल्मन्सा खगेन्द्र चौधरी वडा कार्यालय भवन ध्वस्त पारलपाछे विद्यालयके भवन डेके सहयोग करल बटैलै । पहिले वडा कार्यालयमे सामाजिक सुरक्षा भत्ता वितरण करल मने अब्बे हसुलिया आइपरलपाछे जेष्ठ नागरिक ओ अपाङता रहल व्यक्तिनहे समस्या आइल बटैलै । कैलारी–४ के भल्मन्सा तिलादेवी सुनार जेन्सी आन्दोलनकारीके नाउँमे वडा कार्यालय भवन जराइबेर अपनेहुक्रे रोकेबेर उल्टे धम्की आइल बटैली । वडा कार्यालयमे सेवा सुचारु करल मने पहिले जस्टे सहज नैहुइल उहाँ बटैली ।

पत्रकार लखन चौधरी सुशासन कायम करेक लाग सार्वजनिक सुनुवाई करेपर्ना, किसानहुकन धान विक्री केन्द्रके लाग पहल करेपर्ना बटैले रहिट । कार्यक्रममे वडा अध्यक्षहुक्रे, टमान शाखाके प्रमुखहुक्रे, भल्मन्साहुक्रनके सहभागीता रहे । कार्यक्रम संचालन मानव अधिकार समुह कैलारीके सचिव ज्ञानु चौधरी करल रहिट ।