कञ्चनपुरके अशक्त गणेश चौधरीहे तीर्थराज पन्तसे ह्विलचेयर ओ नगद सहयोग
पहुरा समाचारदाता
धनगढी, २८ कार्तिक । बेलडाडी गाउँपालिका–३, बैबाहके गणेश चौधरी दुर्घटनासे अशक्त बनलपाछे आर्थिक अभावके बीच कठोर जीवन बिटैटी रहल बेला सहायताके हात पुगल बा ।
करिब दुई वर्षआघे काम कैना क्रममे गिरके घाहिल बनल चौधरी उपचारपाछे फे पहिलेके जस्टे अवस्थामे लौटे सेकल नैहो । अब्बे उहाँ पूर्ण रूपमे असक्त बटै ओ दैनिक गतिविधि परिवारके सदस्यके सहारामे चल्टी आइल बटै ।
आर्थिक अवस्था कमजोर हुइल ओरसे सामान्य खैना खर्च समेत धन्न कठिन हुइटी रहल चौधरी परिवारके समस्या बुझके युवा समाजसेवी तथा निसर्ग हस्पिटलके अध्यक्ष तिर्थराज पन्त व्यक्तिगत पहलमे सहयोग प्रदान करले बटै । पन्तसे गणेश चौधरीके गोसिनीय श्रीदेवी चौधरीहे एक थान ह्विलचेयर ओ नगद ११ हजार रुप्या हस्तान्तरण करल हुइट ।
ह्विलचेयर पाइलपाछे श्रीदेवी चौधरी भावुक हुइटी सहयोगी सक्कुहुनप्रति आभार व्यक्त करली । साइकल यात्री भरत विक्रम शाहके समन्वयमे ह्विलचेयर तथा नगद सहयोग उपलब्ध कराइल पन्त जानकारी डेलै ।
सहयोग पाइलपाछे चौधरी परिवारसे दैनिक जीवन सहज हुइना आशा व्यक्त करल बा ।
