धनगढीमे फुटसल प्रतियोगिता हुइना
पहुरा समाचारदाता
धनगढी, १ अगहन । शहिद गौरव जोशी स्मृति निसर्ग स्टार सिटी कप फुटसल प्रतियोगिता २०८२ हुइना हुइल बा ।
स्टार सिटी युवा क्लबके आयोजनामे इहे अगहन १० ओ ११ गते धनगढीके फ्ल्याट ल्याण्डमे प्रतियोगिता हुइना जनाइल बा ।
प्रतियोगिता बारे धनगढीमे सोम्मारके रोज पत्रकार मार्फत जानकारी कराइल हो । स्टार सिटी युवा क्बलके अध्यक्ष नरेन्द्र शाह खास कैके शहिद गौरव जोशीके सम्झना ओ युवानहे लागु पदार्थ दुव्र्यसनीसे बचाइक लाग फुटसल प्रतियोगिता आयोजना करे जैटी रहल जानकारी डेलै ।
उहाँ प्रतियोगितामे विजेताहे नगद रु. एकलाख रुपिया पुरस्कारके व्यवस्था ओ उपविजेताहे नगद रु. पचास हजार पुरस्कारके व्यवस्था रहल जानकारी डेलै । वडा स्तरीय फुटसल प्रतियोगिताके लाग इन्ट्री शुल्क पाँच हजार पाँचसय रहल समेत अध्यक्ष शाह जानकारी डेलै ।
प्रतियोगिताके मुख्य प्रायोजकमे निसर्ग हस्पिटल एण्ड रिसर्च सेन्टर प्रालि रहल बा कलेसे प्रवद्र्धकमे धनगढी उपमहानगरपालिका वडा नम्बर ५ के वडा कार्यालय रहल बा ।
पत्रकार सम्मेलनमे शहिद गौरव जोशीके बाबा बासुदेव जोशी, निसर्ग हस्पिटल एण्ड रिसर्च सेन्टर प्रालिके अध्यक्ष तीर्थराज पन्त, धनगढी उपमहानगरपालिका वडा नम्बर ५ के वडा अध्यक्ष गजेन्द्र शाही लगायत रहल रहिट ।
