सशस्त्र द्वन्दके बेला महिला ओ वालबालिका ढेर प्रभावित
पहुरा समाचारदाता
धनगढी, ४ अगहन । महिला शान्ति ओ सुरक्षासम्बन्धी संयुक्त राष्ट्रसंघ सुरक्षा परिषद्के प्रस्ताव नम्बर १३२५ ओ १८२० के प्रभावकारी कार्यान्वयन लक्ष्यसहित संक्रमणकालीन न्यायके वर्तमान अवस्था तथा चुनौतीबारे बुधके रोज अत्तरियामे छलफल कार्यक्रम सम्पन्न हुइल बा ।
मानव अधिकारका लागि महिला एकल महिला समूह सुदूरपश्चिम प्रदेश, धनगढीके आयोजना ओ कुर्वे विष्ट्रोके सहयोगमे सरोकार निकाय ओ द्वन्द प्रभावित तथा एकल महिलाहुकनसंग छलफल कार्यक्रम हुइल हो ।
संक्रमणकालीन न्याय प्रक्रियामे महिलाके अर्थपूर्ण सहभागिता, सुरक्षा संरचनामे लैङ्गिक समावेशिता ओ महिला अधिकारके मुद्दाहे शान्ति–प्रक्रियासँग जोरके दिगो समाधान आघे बह्रैना उद्देश्यसे कार्यक्रमके आयोजना करल मानव अधिकारका लागि महिला एकल महिला समूह सुदूरपश्चिम प्रदेश, धनगढीके प्रदेश कार्यक्रम अधिकृत वेद अवस्थी बटैली ।
कार्यक्रमके प्रमुख अतिथि रहल जिल्ला समन्वय समिति अध्यक्ष टीका कुमारी चौधरी भुल समाजमे बह्रटी करल विविध चुनौती, लैङ्गिक हिंसा, आर्थिक तथा सामाजिक बहिष्करण जैसिन मुद्दामे राज्य संयन्त्रसे आउर जिम्मेवारीपूर्वक हस्तक्षेप करेपर्ना धारणा रख्ली । उहाँ महिलाके सुरक्षा, न्यायमे पहुँच तथा शान्ति प्रक्रियामे सहभागिताहे संस्थागत करटी स्थानीय तहसे समेत ठोस भूमिका खेलेपर्ना आवश्यकता औँल्यइली ।
सशस्त्र द्वन्दकालमे महिला ओ बालबालिका सबसे ढेर पीडित हुइल कहटी द्वन्दकालके घाउ अभिनसम पुर्ति नैहुइल बटैली ।
कार्यक्रममे अधिवक्ता पुष्प विक्रम शाही “संक्रमणकालीन न्यायके वर्तमान अवस्था ओ चुनौती” विषयमे विस्तृत प्रस्तुतिकरण डेटी सत्य निरूपण, क्षतिपूर्ति, पुनस्र्थापना ओ न्यायिक सुधारमे आधारित समग्र प्रक्रियाहे सुदृढ कैना सुझाव प्रस्तुत करलै । उहाँ समुदायमे हुइटी रहल संवेदनशील घटनामे कानून कार्यान्वयन निकायके भूमिका आउर सुदृढ हुईपर्ना ओ पीडितमैत्री प्रणाली निर्माण आवश्यक रहल उल्लेख करलै ।
फाया नेपालके अध्यक्ष गोमा आचार्य दुसरा राष्ट्रिय कार्ययोजना कार्यान्वयन अन्तिम रहल ओरसे सशस्त्र द्वन्दकालके वास्तविक पीडित कोई छुटल हुइही कलेसे ओइनहे तथ्यांकमे समावेश कैना जरुरी रहल बटैली ।
गोदावरी नगरपालिकाके प्रमुख प्रशासकीय अधिकृत धर्मराम विनाडी अब्बेक बदल्टी अवस्थासे चुनौती ठपल बटैलै । अब्बेक करल कामहे जनता नैरुचाइल ओरसे सक्कु क्षेत्रमे समेटके लैजाई पर्ना जरुरी रहल बटैलै ।
गोदावरी नगरपालिकाके महिला तथा बालबालिका शाखा प्रमुख गोदावरी खत्री एकल महिला, द्वन्दपीडित महिलाके लाग हक अधिकार उठाइक लाग बनल समितिके लाग बजेट विनियोजन करल मने जेनजी आन्दोलनके कार्यक्रम नगरपालिकामे भारी क्षति पुगल कारण बजेट कटौटी हुइल बटैली । उहाँ अइना दिनमे कार्यक्रमसहित आघे बह्रना प्रतिवद्धता जनैली ।
कार्यक्रममे गोदावरी नगरपालिकाके टमान शाखाके प्रमुख, एकल तथा द्वन्द प्रभावित महिलाहुकनके सहभागिता रहे । कार्यक्रमके संचालन मानव अधिकारका लागि महिला एकल महिला समूह सुदूरपश्चिम प्रदेश, धनगढीके प्रदेश कार्यक्रम अधिकृत वेद अवस्थी ओ स्वागत मन्तव्य समुहके जिल्ला उपाध्यक्ष धना पाठक करल रहिट ।
