माघ ५ गतेसे सीप तथा रोजगार मेला हुइना

पहुरा समाचारदाता
धनगढी, ५ अगहन । धनगढीमे अइना माघ ५ गतेसे सीप तथा रोजगार मेला सुरु हुइना हुइल बा । धनगढी उप–महानगरपालिकाके आयोजनामे माघ ५ गतेसे ३० दिन सीप विकास तालिम ओ बाँकी १० दिन परामर्श सम्बन्धि कार्यशाला तथा रोजगार मेला सञ्चालन हुइना उपमहानगरपालिका जनैले बा ।

शुकके रोज पत्रकार सम्मेलन मार्फत सीप तथा रोजगार मेलाके कार्यतालिका सार्वजकि करल हो । अगहन १५ गतेसे आवेदन संकलन कैके पुस १५ गतेसम छनौट ओ नामावली प्रकाशन कैना जनाइल बा ।

रोजगार मेलामे अटोमोबाइल मर्मत, डिजिटल मार्केटिङ, फेटोग्राफी तथा ड्रोन सञ्चालन, हस्पिटालिटी अन्तर्गत वेटररवेट्रेस, वेकरी, कफी बारिस्टा बनैना, फास्टफुडरकुक, शैक्षिक सर्भिस अन्तर्गत पुरोहीत, लेखा व्यवस्थापन, ईसीडी सहजकर्ता, एडभान्स व्युटीसियन, हेयर कटिङ, आर्टरक्राफ्ट डिजाईनिङ अन्तर्गत बेतबाँस हस्तकला, साँस्कृतिक पोशाक, बुटिक तथा कढाई, निर्माण सर्भिस अन्तर्गत प्लम्विङ, फर्निचर, विल्डिङ वाइरिङ, वेल्डिङ ओ मेकानिकल अन्तर्गत एसी तथा फ्रिज मर्मत ओ मोबाइल तथा सिसीटिभि मर्मत कैके सात क्षेत्रके २२ विषयमे तालिम सञ्चालन हुइना धनगढी उपमहानगरपालिकाका रोजगार संयोजक चन्द्र महरा जानकारी डेलै ।

तलिममे सहभागी हुइक लाग दर्ताके लाग सुदूरपश्चिम प्रदेशभरसे अनलाईन तथा अफलाईन माध्याम वा दर्ता शिविर मार्फत आवेदन डेहे सेकजैना उहाँ बटैलै । आवेदकमध्येसे छनौट प्रक्रिया कार्यविधि अनुसार छनौट कैके तालिममे सहभागि डेजैना बा । उपमहानगरसे गत आर्थिक बरसे फेन सीप तथा रोजगार मेला सञ्चालन करल रहे । जेम्ने एक हजार ४० जनहनहे ८ क्षेत्रमे २९ विषयमे तालिम डेहल रहे । उ तालिम लेहल प्रशिक्षार्थीमध्ये ४७ प्रतिशत रोजगारी पाइल रहिट । जौन अन्तर्गत २२६ जाने टमान संस्था वा निकायमे रोजगारीमे संलग्न हुइल ओ १७२ जाने स्वरोजगरीमे संलग्न हुइल नगरपालिकाके तथ्याङ्कमे रहल बा । तालिम लेहलमध्ये २७ जनहनहे थप तालिम ओ सीप विकासके लाग काठमाण्डौँ ओ वुटवल पठाईल रोजगार संयोजक महरा बटैलै । यी अर्थिक बरसमे फेन ढेरसे ढेर युवाहे तालिम डेना लक्ष्य रहल उहाँ बटैलै ।

सीप तथा रोजगार मेला सञ्चालनके लाग उपमहानगरपालिका यी बरस १ करोड ५९ लाख रुपैया बजेट विनियोजन करले बा ओ थप बजेटके लाग अन्य संघसंस्था तथा रोजगारदातासंग सहकार्य कैना धनगढी उपमहानगरपालिकाके उपप्रमुख कन्दकला राना जानकारी डेली । चैत मसान्तसम उपमहानगरपालिकाके रोजगार सेवा केन्द्रसे तालिमके प्रभाव मुल्याङ्कन, पृष्ठपोषण संकलन ओ फलोअप फेन कैना जनैले बा । ढेरसे ढेर युवाहे रोजगार बनैना उद्देश्य रहल ओरसे सीप सिखाके स्वरोजगार बनैना यी अभियानमे सक्कु जाने साथ सहयोग कैना उहाँ आग्रह करली । रोजगार मेला धनगढी उपमहानगरपालिका वडा नम्बर १ स्थित खुला मञ्चमे आयोजना हुइना बा