बेसार, राजमा तथा अर्गानिक खेती सम्बन्धी पाँच दिने तालिम
पहुरा समाचारदाता
धनगढी, ८ अगहन । एकल महिला, द्वन्द प्रभावित महिला ओ सीमान्तकृत समुहहे लक्षित करके महिला सशक्तीकरण नेतृत्व, द्वन्द समाधान परिवर्तन तथा दिगोपना सम्बन्धी सीप अभिवृद्धिके लाग वेसार खेती, अर्गानिक तरकारी खेती तथा राजमा खेती सम्बन्धी पाँच दिने तालिम सम्पन्न हुइल बा ।
मानव अधिकारका लागि महिला एकल महिला समुह सुदूरपश्चिम प्रदेशसे कुर्वे विष्ट्रोके सहयोगमे आयोजना हुइल पाँच दिने तालिम शनिबार सम्पन्न हुइल हो ।
तालिम समापन कार्यक्रममे कैलाली उद्योग बाणिज्य संघके अध्यक्ष पुस्कारराज ओझा सक्कु जाने आपन क्षमता, सीप अनुसार काम करलेसे कोइफे वेरोजगार नैहुइना बटैलै ।
उहाँ कहलै, विदेशमे कौनो घरमे चार जाने सदस्य बटी कलेसे चारु जाने काम करठै मने हमार देशके अवस्था हेरलेसे भर कौनो घर चार जाने हुइलेसे एक जाने केल्ह कैना और सदस्य ओम्ने निर्भर हुइना परिपाटी रहल बा ।
एकल महिला, द्वन्द प्रभावित महिला ओ सीमान्तकृत समुहसे उद्यमी बन्के कौनो व्यवसाय करलेसे कैलाली उद्योग बाणिज्य संघ पुलके काम करके बजारीकरणमे सहयोग कैना अध्यक्ष ओझा बटैलै । धनगढी बजार ओजरार हुसेकल ओरसे रात्रीकालिन बजार संचालनके लाग आग्रह करल ओ सुरक्षाके लाग सिसि क्याम्रा चाहलेसे कैलाली उद्योग बाणिज्य संघसे उपलब्ध करैना बटैलै ।
कोरोना कालमे नेपालीहुक्रे टिना खेतीमे करिब आत्मनिर्भर हुसेकल रहिट उहाँ कहलै, अब्बे फेरसे भारतके ल्यानल निर्भर हुई लागल बटै । यहाँ उत्पादन ओ उद्यम संंचालन करे सेक्लेसे बजारफे रहल ओरसे बजारीकरणमे समस्या नैहुई ।
कैलाली उद्योग वाणिज्य संघसे यिहे अगहन २२ गतेसे संचालन करे जैटी रहलमे एकल महिला, द्वन्द प्रभावित महिला ओ सीमान्तकृत समुहहे एक ठो स्टल निशुल्क रुपमे उपलब्ध करैना प्रतिवद्धताफे जनैलै ।
राष्ट्रिय मानव अधिकार आयोग सुदूरपश्चिम प्रदेश कार्यालयके उपसचिव झंकरबहादुर रावल नेपालमे ढेर स्रोत साधन रहल मने व्यवस्थापन ओ प्रयोग करे नैसेकल बटैलै ।
नेपाली बजारमे भारतिय उत्पादन ढेर हुके यहाँके व्यवसायी, उद्यमी मारमे परल ओरसे भारतिय तरकारी बन्द करके नेपालमे उत्पादनमे जोड डेलै यहाँके एकल महिला, द्वन्द प्रभावित महिला ओ सीमान्तकृत समुहहे फाइदा पुग्न बटैलै ।
फाया नेपालके अध्यक्ष तथा महिला अधिकारकर्मी गोमा आचार्य हरेक महिलासँग कुछ ना कुछ सीप रहल ओरसे सीपके प्रयोग करके बनाइल बस्तुहे व्यावसायिक बनाई सेक्लेसे आर्थिक रुपमे शसक्त बनाई सेक्ना बटैलै ।
कार्यक्रममे सहजीकरण करटी मानव अधिकारका लागि महिला एकल महिला समुह सुदूरपश्चिम प्रदेशके कार्यक्रम अधिकृत वेद अवस्थी एकल महिला, द्वन्द प्रभावित महिला ओ सीमान्तकृत समुहहे आर्थिक सशक्तीकरण ओ नेतृत्व तहमे पुगाइक लाग तालिमके आयोजना करल बटैली । उहाँ उद्यमी व्यवसायीसे उत्पादन करल वेसार संकलनके लाग धनगढीमे एक ओ गोदावरीमे दुई करके तीन ठो संकलन केन्द्र स्थापना कैना बटैलै ।
कार्यक्रममे मानव अधिकारका लागि महिला एकल महिला समुह सुदूरपश्चिम प्रदेश अध्यक्ष सुमन शर्मा, उपाध्यक्ष शान्ती महत, उद्यमी प्रिया रानालगायतसे मन्तव्य व्यक्त करले रहिट । समुहके जिल्ला अध्यक्ष भगवती हमालके अध्यक्षतामे हुइल तालिम समापन कार्यक्रममे समुहके कोषाध्यक्ष मीना भण्डारी स्वागत मन्तव्य राखल रहिट । तालिममे पाँच दिनसम कृषि प्राविधिक हेमराज भट्ट प्रशिक्षण डेहल रहिट । तालिममे गोदावरी ओ धनगढी उपमहानगरपालिकाके २५ जाने सहभागि रहल रहिट ।
