लम्कीचुहामे सिटी हल तथा संग्रहालय शिलान्यास
पहुरा समाचारदाता
लम्की, १० अगहन । सुदूरपश्चिम प्रदेशके मुख्यमन्त्री कमल बहादुर शाह प्रदेशमे सन्तुलित बजेट निर्माण प्रति अपने चिन्तित रहल बटैले बटै ।
बुधके लम्कीचुहा–४ मे निर्माण हुइ लागल सिटी हल, संग्रहालय तथा घेरापर्खाल निर्माण कार्यके शिलान्यास कैटी उहाँ पहाडी ओ तराई जिल्ला बिच विकासके सन्तुलन कायम कैना आवश्यक रहल बटाइल हुइट । सात जिल्लाके भ्रमण ओराके घुमल मुख्यमन्त्री शाह बाजुरा–बझाङ जैसिन विकट पहाडी क्षेत्रमे विकासके कामहे प्राथमिकता डेना प्रतिबद्धता व्यक्त कैटी उहाँ कहलै, “तराईके क्षेत्रमे विकाससे फड्को मारल बा, आब विकास पहाड ओ दुर्गम बस्ती केन्द्रित हुइ परल ।”
शिलान्यासके अवसरमे मख्यमन्त्री शाह शिक्षा, स्वास्थ्य, खानेपानी लगायतके बरवार परियोजना फेन शीघ्र शिलान्यास तथा उद्घाटनके चरणमे रहल जानकारी डेटी उहाँ प्रदेशके सर्वांगीण विकासके लाग अपने निरन्तर सक्रिय भूमिका खेल्ना उल्लेख करलै ।
जननिर्वाचित प्रतिनिधि बिच समन्वय ओ साझा उद्देश्य आवश्यक रहल बटैटी उहाँ संग्रहालयहे प्रभावकारी रूपमे आघे बह्रैना स्थानीय तह ओ सरोकारवाला सक्कु जाने सचेत ओ जिम्मेवार हुइ पर्ना जोड डेलै ।
प्रदेश सरकारके बजेटसे बने लागल लम्कीचुहा सिटी हल, संग्रहालय तथा पर्खाल निर्माणके लाग गोरखनाथ–पूर्वपश्चिम–निधि जेभी, काठमाडौंसँग रू. १३ करोड १९ लाखमे ठेक्का सम्झौता हुइल बा । उ परियोजनाके कुल लागत रू. २२ करोड ८९ लाख १७ हजार ७५६ रुपिया रहल जनाइल बा ।
बहुउद्देश्यीय रूपमे प्रयोग करे मिल्ना सिटी हलसे सार्वजनिक सभा, सांस्कृतिक कार्यक्रम, प्रदर्शनी तथा अन्य गतिविधिमे सहजता हुइना अपेक्षा करल बा । निर्माण कार्य २०८४ साल कुवाँर ३० गतेभिट्टर सम्पन्न कैना लक्ष्य राखल बा ।
