प्रदेश स्तरीय यूवा मञ्चसे १२ बुँदे घोषणापत्र जारी

पहुरा समचारदाता
धनगढी, १३ माघ । प्रदेश स्तरीय यूवा मञ्चसे राजनीतिक निर्णय प्रक्रियामे युवा ओ महिलाके अर्थपूर्ण सहभागिताके लाग सुदुरपश्चिम घोषणापत्र २०८२ जारी करले बा ।

ओरेक नेपाल कैलाली, गैसस महासंघ नेपाल, एकता नेपाल, एसियन ऐकेडेमी, सुदूरपश्चिम समाज, निडस नेपाल, पिसविन, याक नेपाल, डब्लुएचआरडी, सिविन, फेडो, फाया नेपाल, डिड मिसन टु नेपाल, दलित महिला अधिकार मञ्चके सहकार्यमे सोम्मारके रोज धनगढीमे हुइल प्रदेश स्तरीय यूवा मञ्चसे १२ बुँदे प्रदेश स्तरीय घोषणापत्र ओ ७ बुँदे प्रतिवद्धतापत्र जारी करल डिड मिसन नेपालके कार्यकारी निर्देशक नन्दराज भट्ट बटैलै ।

मञ्चसे जारी करल घोषणापत्रमे नेतृत्व पुस्तान्तरण, संस्थागत विकासः राजनीतिक दलसे अपन विधान ओ संरचनाहे लोकतान्त्रिक, समावेशी बनैटी नेतृत्व तहमे युवा ओ महिलाके अर्थपूर्ण सहभागिता सुनिश्चित करके नेतृत्व पुस्तान्तरणके पद्धतिहे अनिवार्य रूपमे संस्थागत कैना माग करले ।

निर्वाचनमे प्राथमिकताः प्रचलित निर्वाचन प्रणाली बमोजिम हुइना प्रत्यक्ष निर्वाचनमे महिला ओ युवाहे उम्मेदवार बन्न समान अवसर प्रदान करटी ओइनहे टिकट वितरणमे प्राथमिकता डेना नीतिगत व्यवस्था अवलम्बन करेपर्ना कहल बा । नैतिक ओ उत्तरदायी राजनीतिः राजनीतिहे सेवा ओ निष्ठाके आधारमे सञ्चालन करके यी क्षेत्रमे व्याप्त विसङ्गति न्यूनीकरण कैना युवा ओ महिलाहे नैतिक नेतृत्वके लाग प्रोत्साहित करेपर्ना कहल बा ।

समानुपातिक ओ समावेशी प्रतिनिधित्वः राजनीतिक दलके सक्कु तहके संरचनामे महिलाके न्यूनतम ३३ प्रतिशत ओ युवाके हकमे जनसाङ्ख्यिक भारके आधारमे समानुपातिक प्रतिनिधित्वके सुनिश्चितता करेपर्ना कहल बा । विशिष्ट समुदायके अधिकारः दलित, सीमान्तकृत, अपाङ्गता हुइल ओ लैङ्गिक तथा यौनिक अल्पसंख्यक समुदायके महिला एवं युवाके राजनीतिक अधिकार ओ पहुँच सुनिश्चित कैना राज्य ओ दलहुक्रे विशिष्ट कानुनी वा संरचनागत संयन्त्र निर्माण करे व्यवस्था करेपर्ना कहल बा ।

एजेन्डाके सम्बोधनः आगामी हुइना स्थानीय, प्रादेशिक ओ संघीय निर्वाचनके घोषणापत्रमे युवा ओ महिलाके विशिष्ट आवश्यकता, मुद्दा ओ प्राथमिकताहुकनहे स्पष्ट रूपमे सम्बोधन ओ समावेश कैना पहल करेपर्ना कहल बा । युवा विकास ओ क्षमता अभिवृद्धिः युवा नीति २०७२ ओ युथ भिजन २०२५ के अपूर्ण लक्ष्यहुकनहे पुनरावलोकन करके क्षमता अभिवृद्धिके कार्यक्रम सञ्चालन कैना ओ महिलाहे निर्णय प्रक्रियाके उप्पर तहमे पुगाइक लाग लक्षित सशक्तिकरण कार्यक्रम सञ्चालनके लाग माग करल बा ।

अन्तर्राष्ट्रिय प्रतिवद्धताके कार्यान्वयनः संयुक्त राष्ट्र संघके सुरक्षा परिषद् प्रस्ताव नं. २२५० (युवा, शान्ति ओ सुरक्षा) ओ प्रस्ताव नं. १३२५÷१८२० (महिला, शान्ति ओ सुरक्षा) संग सम्बन्धित राष्ट्रिय कार्य योजनाहे स्थानीय तहसम कार्यान्वयन करेपर्ना कहल बा ।
हिंसा रहित समाज ओ न्यायःसमाजमे दिगो शान्ति कायम कैना महिला ओ युवा विरुद्ध हुइना सक्कु मेरिक हिंसा ओ भेदभावके अन्त्य करके ओइनके न्यायिक उपचारमे सहज ओ सुरक्षित पहुँच सुनिश्चितके लाग पहल करेपर्ना कहल बा ।

आर्थिक स्वावलम्बन उद्यमशीलता ओ नेतृत्व ःएक वडा, एक युवा उद्यमी नेता जैसिन कार्यक्रममार्फत स्थानीय स्रोत परिचालन करके युवाहुकनहे स्वरोजगार बनैना ओ सीपमूलक एवं व्यावहारिक शिक्षामे राज्यके लगानी वृद्धि करके प्रतिभा तथा बौद्धिक पलायन न्यूनीकरणके लागि नीति तथा कार्यक्रमके पहल करेपर्ना कहल बा ।

डिजिटल सचेतना ओ सञ्जालीकरणः सामाजिक सञ्जालके जिम्मेवार प्रयोगमार्फत राजनीतिक सचेतना अभिवृद्धि कैना ओ गलत सूचना तथा घृणित वक्तव्य विरुद्ध शून्य सहनशीलताके नीति लेटी डिजिटल सञ्जाल मार्फत सामूहिक ऐक्यबद्धता कायम करेपर्ना, साथे निर्वाचनके हरेक सामाग्रीहुक्रे (मतदान पत्र, प्रचार प्रसार सामाग्री, सूचना सामाग्री) अपाङ्गतामैत्री बनाई पर्ना कहल बा ।

सेवामुखी राजनीतिः राजनीतिहे पेसाके रूपमे नैहुके सेवाके रूपमे विकास करेपरठ । नातावाद ओ कृपावादके अन्त्य करटी, अनुसन्धान ओ योगदानके आधारमे नेतृत्व चयन कैना पद्धतिके विकास करेपर्ना कहल बा । हम्रे दृढताके साथ यी घोषणा करटी कि युवा ओ महिलाहुक्रे केवल निर्वाचनके ’मतदाता’ मात्र नाही, बरु ओइनके एजेन्डा निर्धारक, नीति निर्माता ओ लोकतान्त्रिक अभ्यासके सच्चा पहरेदार हुइट ।

यी घोषणापत्र नेपाली राजनीतिमे अर्थपूर्ण समावेशिता ओ न्यायपूर्ण प्रतिनिधित्व सुनिश्चित कैना हमार सामुहिक सङ्कल्प हो । नेपालके संघीय लोकतान्त्रिक गणतन्त्रसे एक समावेशी ओ न्यायपूर्ण समाजके संकल्प करले बा । देशके कुल जनसंख्याके झन्डै ४२ प्रतिशत हिस्सा ओगट्न युवा ओ ५१ प्रतिशतसे ढेर रहल महिला सामाजिक–आर्थिक रूपान्तरणके वास्तविक संवाहक हुइट ।

सुदुरपश्चिम प्रदेशमे केल्ह ४ लाख २६ हजार ७८२ पुरूष ओ ५लाख २९ हजार ०७४ महिला करके जम्मा ९५५८५६ युवाके जनसंख्या ओ महिलाके जनसंख्या १४ लाख २१ हजार ९९७ रहल बा । मने नीतिगत व्यवस्थाके बावजुद राजनीतिक निर्णय प्रक्रियामे युवा ओ महिलाके अर्थपूर्ण उपस्थिति अभिनफे चुनौतीपूर्ण डेखल बा । विद्यमान राजनीतिक संस्कारमे सुधार, लोकतान्त्रिक मूल्य–मान्यताके सुदृढीकरण ओ दिगो शान्तिके लाग नेतृत्व तहमे ओइनके सक्रियता अब छनौटके विषय केल्ह नैहुके अनिवार्य आवश्यकता बनल बा ।

’युथ भिजन २०२५’, ’राष्ट्रिय युवा नीति २०७२’ ओ संयुक्त राष्ट्र संघके सुरक्षा परिषद्के प्रस्ताव (१३२५, १८२० ओ २२५०) के मर्महे आत्मसात् करटी राज्यके हरेक तहमे निर्णायक सहभागिता सुनिश्चित कैना यी साझा मागपत्र प्रस्तुत कैगिल बा । युवा ओ महिलाहे केवल ’भोट बैंक’ के रूपमे केल्ह सीमित नैकरके नीति ओ एजेन्डा निर्धारण कैना प्रमुख राजनीतिक पात्रके रूपमे स्थापित कैना सात बुँदे प्रतिबद्धता सहितके आव्हान सहितके धनगढी प्रतिबद्धता तथा घोषणा पत्र, २०८२ जारी करल बा ।
मञ्चसे करल प्रतिबद्धतामे सक्रिय सहभागिता ओ प्रश्न कैना संस्कृतिः हम्रे केवल मौन दर्शक नैबनके शासन व्यवस्था, राजनीतिक विकृति ओ सामाजिक अन्यायके विरुद्ध निरन्तर प्रश्न उठैना ओ खबरदारी कैना संस्कृतिहे आत्मसात् कैना प्रतिबद्धता व्यक्त करले बटी ।

प्रमाणमे आधारित वकालतः हम्रे हमार माग ओ मुद्दाहे भावनो केल्ह सीमित नैधारके तथ्य, अनुसन्धान ओ तथ्याङ्कमे आधारित हुके व्यवस्थित रूपमे प्रस्तुत कैबी ।

समावेशी नेतृत्वके प्रवद्र्धनः दलित महिला, अपाङ्गता हुइल व्यक्ति, यौनिक तथा लैगिक अल्पसंयक समुदायके नेतृत्वहे स्वीकार करटी ओइनके अर्थपूर्ण प्रतिनिधित्वके लाग अपन ठाउसे पहल कैबी ।

आर्थिक स्वावलम्बन ओ उद्यमशीलताः राजनीतिहे केल्ह परिवर्तनके माध्यम नैबनामे युवा उद्यमशीलता ओ आर्थिक सशक्तिकरण मार्फत आत्मनिर्भर समाज निर्माणमे योगदान कैबी ।

व्यवहार ओ दृष्टिकोणमे परिवर्तनः अल्पसंख्यक ओ सीमान्तकृतसमुदायप्रति समाजमे रहल नकारात्मक ओ विभेदकारी दृष्टिकोणहे अपने व्यवहारसे परिवर्तन कैना ओ समावेशी समाजके मूल्य–मान्यताहे व्यवहारमे उतार्न हम्रे प्रतिबद्ध बटी । सामाजिक इन्जिनियरिङः हम्रे अपन पेशा (डाक्टर, शिक्षक, कर्मचारी, उद्यमी आदि) मे रहटी अपन जिम्मेवारी ओ उत्तरदायित्व इमानदारीपूर्वक वहन करके समाज रूपान्तरणके संवाहक बन्न प्रण करटी ।

नीतिगत पैरवीः स्थानीयसे संघीयतहसमके नीति युवा–मैत्री, लैङ्गिक–मैत्री ओ अपाङ्गता–मैत्री बनाइक लाग निरन्तर दबाब डेना ओ सरोकारवालासंग सहकार्य कैबी ।

मञ्चसे घोषणापत्र तथा प्रतिबद्धतापत्र तयार करेक सोम्मारके रोज सुदूरपश्चिम प्रदेशके टमान बौद्धिक व्यक्तित्व, नागरिक समाज, बुद्धिजिवीहुकनसे छलफल करल रहे ।