क्षेत्र नम्बर ३ के उम्मेदवार बडुवालसे चुनावी घोषणापत्र सार्वजनिक

पहुरा समाचारदाता
धनगढी, २८ माघ । कैलाली क्षेत्र नम्बर ३ नेपाली कांग्रेसके उम्मेदवार भीम बडुवाल आपन चुनावी घोषणापत्र सार्वजनिक करले बटै ।

मंगरके सुखडमे पत्रकार सम्मेलन कैके उहाँ आपन १३ बुँदे चुनावी घोषणापत्र सार्वजनिक करल हुइट । उहाँसे सार्वजनिक करल घोषणा पत्रमे आपन पाँच बरसमे करे सेक्ना कामके फेहरिस्त समेट्ले बटै । उहाँके घोषणा पत्र तथा प्रतिबद्धतापत्रमे क्षेत्र नम्बर ३ मे पर्ना कैलारी, भजनी घोडाघोडी नगरपालिकाके सक्कु वडामे शिक्षा, स्वास्थ्य, सुरक्षित बस्ती, रोजगारी ओ आधुनिक पूर्वाधारके दीगो विकासहे प्राथमिकतामे राखके जनताके जीवनस्तर सुधार कैना करल बा ।

ओस्टके कान्द्रा लडिया कोरिडोर निर्माण अन्तर्गत घोडाघोडीसे भजनीसम ३८ किलोमिटर लम्मा तटबन्ध निर्माण, लडिया नियन्त्रण, हरित कोरिडोर, बाइरोड निर्माण, चक्लाबन्दी खेती÷करार खेती कैना बहुउद्देश्य परियोजनाहे राष्ट्रिय गौरव तथा बरवार योजनाके रूपमे आघे सारल बावै ।

डुबान ओ बारह् प्रभावित जोखिम क्षेत्रके नक्साङ्कन कैके मोहना, कान्द्रा, काढा, पथरैया, कटैनी, डोडालगायत लडिया नियन्त्रण ओ तटबन्धन करजैना घोषणापत्रमे उल्लेख करल बा । ओस्टके तीन पालिकाके टमान वडामे पक्की पुल, सडक कालोपत्रे, ढल निकास, खेल मैदान निर्माण, बसपार्क निर्माण करजैना उल्लेख बा ।

शिक्षा सुधार ओ सीप विकासके लाग सक्कु पालिकामे सहज शिक्षा पहुँचके लाग पहल करजैनाके साथे टमान शैक्षिक संस्थाहे प्राविधिक तथा सीप मूलक शैक्षिक संस्थाके विकास, रहल उच्च शिक्षा प्रदायक संस्थाके व्यवस्थापन, उच्चशिक्षामे सक्कु बालबालिकाके पहुँचके लाग छात्रावृत्तिके व्यवस्था करजैना घोषणापत्रमे उल्लेख रहल बा ।

स्वास्थ्य सेवा सुदृढीकरणके लाग प्रत्येक पालिकामे सुविधा सम्पन्न १५ से २५ सय्याके अस्पताल स्थापना तथा स्तरोन्नति, एम्बुलेन्स सेवा विस्तार, सिकलसेल रोगके निःशुल्क उपचार, स्वास्थ्य बिमाहे प्रभावकारी बनैटी पाँच लाख रुपियाँसमके स्वास्थ्य बिमा कार्यक्रम लागु कैना प्रतिबद्धता पत्रमे उल्लेख रहल बा । पर्यटन, भाषा, कला, संस्कृति ओ वातावरण संरक्षणमे जोड डेटी प्रतिबद्धता पत्रमे घोडाघोडी क्षेत्रहे पर्यटकीय केन्द्रके रूपमे ओ अन्य तीन पालिकामे रहल प्राकृतिक टल्वा, धार्मिकस्थलके संरक्षणसँगे पर्यटकीय विकास करजैना उल्लेख रहल बा ।

युवा, रोजगारी ओ उद्यमशीलताके विषयमे टमान योजना घोषणापत्रमे सेमटल बा । ओस्टके महिला, दलित, सुकुमवासी, मुक्त कमैया, मुक्त कमलरी तथा पिछडल समुदायके सशक्तीकरण ओ आत्मनिर्भरताके टमान कार्यक्रम समेटल बा ।

भ्रष्टचारविरुद्ध शून्य सहनशीलता अपनैटी २०४६ सालपाछेक सार्वजनिक पद धारण करुइया उच्च पदस्थ व्यक्तिके सम्पत्ति छानबिनसम्बन्धी कानुन बनैना पहल कैना प्रतिबद्धतापत्रमे समेटल बा ।

पहिलचो संसदीय निर्वाचनमे उम्मेदवार बनल बडुवाल सुशासनयुक्त समाज, जवाफदेही सरकार, भ्रष्टाचार मुक्त राजनीति ओ समृद्ध कैलाली क्षेत्र नम्बर ३ निर्माण कैना दृढ संकल्पका साथ अपने जनताके माझ आइल बटैले बटै । कैलाली ३ मे चुनावी घोषणापत्र सार्वजनिक करुइयामे नेपाली कांग्रेस पहिल हुइल बा । अन्य दलसमेत चुनावी अभियानसँगे घोषणापत्रके तयारीमे जुटल जनैले बटै ।

नेपाली कम्युनिस्ट पार्टीके उम्मेदवार वीरमान चौधरी माघ अन्तिमसम चुनावी प्रतिबद्धतापत्र अइना जानकारी डेलै । नागरिक उन्मुक्ति पार्टी नेपालके उम्मेदवार विक्रम चौधरी पार्टीके अध्यक्ष रेशम चौधरी घोषणापत्र तयार कैना जनैटी उ घोषणापत्रमे आपन क्षेत्रके समस्याहे काँटछाँट कैके जनता माझ लैजैना तयारी रहल सुनैलै ।

नेकपा (एमाले) के उम्मेदवार गौरीशङ्कर चौधरी समेत घोषणापत्र तयार होसेकल जनैटी कुछ दिनमे जनतामाझ प्रतिबद्धतापत्र अइना उल्लेख करलै । राष्ट्रिय स्वतन्त्र पार्टीके घोषणापत्र फागुन ४ गतेसम सार्वजनिक हुइना जनाइल बा ।