सुदूरपश्चिम कांग्रेससे १५ बुँदे सङ्कल्प

नागरिकमुखी शासन ओ समुन्नतिमे जोड

पहुरा समाचारदाता
धनगढी, २८ बैशाख । नेपाली कांग्रेसके सुदूरपश्चिम प्रदेशस्तरीय भेलासे स्थानीय सरकारहे थप जनउत्तरदायी ओ सुशासनयुक्त बनैना उद्देश्यके साथ १५ बुँदे धनगढी सङ्कल्प पारित करले बा ।

धनगढीमे आयोजित दुई दिने भेलामे प्रदेशके स्थानीय तहके जनप्रतिनिधि ओ पार्टी नेतृत्वबिच हुइल विस्तृत छलफलपाछे यी सङ्कल्प सार्वजनिक करल हो ।

कांग्रेससे परिकल्पना करल समुन्नत नेपालके मुख्य आधार गाउँ ओ नगरके विकास रहल ठहर करटी भेलासे नागरिकके प्रत्यक्ष सरोकारके विषयमे प्रभावकारी सेवा प्रवाह कैना प्रतिबद्धता जनैले बा । भेलासे पारित करल सङ्कल्पके मुख्य प्राथमिकतामे नागरिकके स्वतन्त्रताके रक्षा ओ उत्तरदायी सरकारके निर्माण रहल बा ।

कांग्रेससे अपन नेतृत्वके स्थानीय सरकारसे कैना हरेक निर्णय विधिमे टेक्के केल्ह कैना ओ कानुन कार्यान्वयन करेबेर मानवीय पक्षहे केन्द्रमे रख्न प्रतिबद्धता व्यक्त करले बा । सेवा प्रवाहहे थप सरल बनैटी अपाङ्गता हुइल व्यक्ति, ज्येष्ठ नागरिक, गर्भवती ओ विपन्न समुदायके लाग ‘घर–आँगन सेवा’ हे व्यवस्थित बनैना सङ्कल्पमे उल्लेख बा । ओस्टे, स्थानीय तहसे करल असल अभ्यासके श्रव्य–दृश्य सामग्री निर्माण करके जनताहे सुसूचित कैना ओ व्यवस्थापकीय कमजोरी सुधर्ना लक्ष्य राखल बा ।

असार १० गतेभिटर अनिवार्य बजेट पेस कैना, योजना तर्जुमाके सात चरण पुरा कैना ओ ‘प्रोजेक्ट बैंक’ मार्फत केल्ह योजना छनोट कैना सङ्कल्प करल बा । टुक्राटाक्री योजनासे परिणाममुखी काममे जोड डेटी जनताके करहे अनुत्पादक क्षेत्रमे लगानी नैकैना ओ बेरुजु शून्य बनैना विशेष अग्रसरता लेना भेलाके निर्णय बा ।

योजना बनाईबेर स्थानीय पार्टी समिति ओ विज्ञसँग परामर्श कैना तथा हरेक दुई महिनामे पार्टी–सरकार समन्वय संयन्त्रके बैठक बैठना व्यवस्था मिलैना हुइल बा ।

रोजगारी ओ सामाजिक सुरक्षाके क्षेत्रमेफे भेलासे महत्वपूर्ण योजना आघे सारल बा । ‘रोजगार बैंक’ ओ ‘उद्यमी आमा’ जैसिन कार्यक्रममार्फत महिला ओ वैदेशिक रोजगारीसे लौटल युवाहे स्वरोजगार बनैना नीति लेहल बा ।

स्वास्थ्य ओ शिक्षामे आन्तरिक लगानी बह्रैना, सक्कु नागरिकहे स्वास्थ्य बिमामे समेट्न ओ सिकलसेल एनिमिया जैसिन रोगके लाग विशेष कार्यक्रम सञ्चालन कैना सङ्कल्पमे उल्लेख बा ।

भूमिहीन दलित, सुकुमबासी ओ अव्यवस्थित बोसोवासीके समस्या समाधानके लाग लगत सङ्कलन ओ पुर्जा वितरणके पहल कैना तथा मुक्त हलिया ओ कमैयाके लाग जीविकोपार्जनके कार्यक्रम ल्यन्ना कांग्रेस जनैले बा ।

छाउपडी, बालविवाह, बोक्सी प्रथा ओ जातीय विभेद नियन्त्रणके लाग नेतृत्वदायी भूमिका निर्वाह कैना तथा स्थानीय भाषा ओ संस्कृतिके संरक्षण कैना सङ्कल्प करल बा । यकर साथे कर्मचारी व्यवस्थापन ओ सङ्घीयता कार्यान्वयनमे डेखल कानुनी अड्चन हटैना संघ ओ प्रदेश सरकारके ध्यानाकर्षण करैटी समन्वय, सहकार्य ओ सहअस्तित्वके सिद्धान्तके आधारमे आघे बह्रना भेलासे अपिल करले बा ।