कस्पुरिया कृषक समुहहे कृषि सामाग्री हस्तान्तरण
पहुरा समाचारदाता
धनगढी, २ जेठ । कैलाली जिल्लाके कैलारी गाउँपालिका वडा नम्बर १ हसुलियामे रहल कस्पुरिया मगर एकिकृत कृषक समुहहे कृषि सामाग्री हस्तान्तरण कैगिल बा ।
कैलारी गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे उ समुहहे बसन्ते मकै खेती प्रवद्र्धन कार्यक्रम मार्फत कृषि ज्ञान केन्द्रके अनुदानमे कृषि सामाग्री हस्तान्तरण कैगिल हो । कार्यक्रममे सम्बोधन कैटी गाउँपालिका उपाध्यक्ष उ सामाग्रीके कृषि कार्यमे सही सदुपयोग कैटी उत्पादन वृद्धि कैनामे जोर डेहल रहिट । उहाँ कहली, बसन्ते मकै खेतीके लाग उ सामाग्री हस्तान्तरण कैगिल हुइलेसेफे ओकरसंगे टमान मेरिक तरकारी खेतीके प्रयोग कसेसेक्ना मने मजा से बचाके धरबी । उ समुहहे छनौट कृषि हस्तान्तरण कैलमे कृषि ज्ञान केन्द्रहे धन्यवादफे ज्ञापन व्यक्तफे उहाँ करली ।
कृषि ज्ञान केन्द्र धनगढीके गोपीलाल चौधरी उ सामाग्री आपन लगानी मानके सदुपयोग कैना आग्रह करलै । उहाँ कहलै, अनुदानमे आइल चिजहे जटन नैकरठै । मने अपनेहुक्रे ओसिन न करबी । जटन कैके चलैबी कलेसे ढेर दिनसम टिकी, जथाभावी छोरडेवी नैटिकी ।
उ समुहहे पानी मोटर २ एचपीके पाँच ठो, डेलीभरी पाइप १०० किलो, कर्नसेलर २ रो मेसिन (मकै निखोर्ना) २ ठो, स्प्रे टंकी १६ के १० ठो, सुक्ष्म तत्व ओ विषादी डेहल रहे । कलेसे मकै छिटना बेला १०० किलो मकैके विया डेहल रहे ।
कार्यक्रम कस्पुरिया मगर एकिकृत कृषक समुहके अध्यक्ष मन्तराम चौधरीके अध्यक्षतामे हुइल रहे । कलेसे संचालन ओ ओकर बारेमे जानकारी समुहके सचिव सुरेन चौधरी करल रहिट । उ संगे उ कार्यक्रमके सार्वजनिक सुनुवाईफे हुइल रहे ।
