हाँस प्रजातिके चिरैनके प्रजनन् सिजन सुरु
पहुरा समाचारदाता
धनगढी, ८ जेठ । सुदूरपश्चिम प्रदेशमे पैना पाँच मेरिक हाँस प्रजातिके चिरैनके प्रजनन् (ब्रिडीङ) सिजन सुरु हुइल बा ।
नादुन हाँस, नक्टा हाँस, सिलसिले हाँस ओ हरिहाँस ओ हरियर मुरी हाँसके प्रजनन् सिजन सुरु ह्ुइल हो । हरियर मुरी हाँससे समुद्री सतहसे दुई हजार ३०० मिटर उचाईमे रहल अछामके रामारोशनस्थित जिंगले ओ बाटुल्ला तालमे प्रजनन् कैना करल बटै । नादुन हाँस, नक्टा हाँस, सिलसिलेहाँस ओ हरिहाँससे तराईक सिमसार क्षेत्रमे प्रजनन् कैना करल चराविद् हिरुलाल डङ्गौरा जानकारी डेलै । उहाँक अनुसार नेपालमे छ मेरिक हाँस प्रजातिके चिरै प्रजनन् कैना करल बटै ।
चखेवाबाहेक बाँकी पाँच प्रजातिसे सुदूरपश्चिममेफे प्रजनन् करटी रहल डङ्गौराके कहाई बा । “चखेवासे मुस्ताङमे ब्रिडीङ करल अभिलेख बा”, उहाँ कहलै,“यी प्रजातिके हाँसके ब्रिडिङ सिजन यिहे बेला हो ।” नादुन हाँससे विश्व रामसार क्षेत्रमे सूचीकृत घोडाघोडी चरा अभयारण्य ओ शुक्लाफाँटा राष्ट्रिय निकुञ्जमे रहल तालमे ब्रिडीङ कैना करल अभिलेख बा ।
नेपालके लाग सङ्कटापन्न चराके सूचीमे रहल नक्टा हाँससहित सिलसिले हाँस ओ हरिहाँससे कैलाली, कञ्चनपुरके सिमसार क्षेत्रमे रहल रुखुवाके टोड्कामे प्रजनन् करटी आइल जनाइल बा । तालके पानीमे रमैना यी प्रजातिके हाँस अण्डा डेना ओ बच्चा कोरल्न कार्य भर सुखल रुखुवाके टोड्कामे कैना करल बटै ।
जुरार ठाउँमे ब्रिडीङ कैना हरियर मुरी हाँस भर अछामस्थित रामारोशन गाउँपालिका–५ के रामारोशन क्षेत्रमे रहल जिंगले ओ बाटुल्ला तालमे प्रजनन् कैना करल अभिलेख बा । रामारोशन क्षेत्रके १२ बण्डहरुमध्ये जिंगले ओ बाटुल्ला भार िताल हुइट । दुनु तालमे अनुगमन करेबेर ३४ ठो हरियर मुरीके हाँस अभिलेख हुइल चराप्रेमी सुवन चौधरी बटैली । नेपालमे ३६ मेरिक हाँस प्रजातिके चरा पैना करल बटै ।
रैथाने हाँस प्रजातिके बाहेक अन्य हाँस प्रजातिके चरा भर जाडर याममे आगन्तुक चिरैनके रुपमे उत्तरी ध्रुवसे नेपालके टमान तालतलैयामे अइना करल जनाइल बा ।
