रानीसैनके सीमा विवाद समाधान कैना नगरप्रमुख हमालके माग
पहुरा समाचारदाता
धनगढी, ११ जेठ । धनगढी उपमहानगरपालिकाके प्रमुख गोपाल हमालसे साइपाल हिमालके बेसक्याम्प रानीसैन ओ ओकर लग्गेक लाम्पाटा क्षेत्रमे डेखल सीमा विवादके कारण पर्यटक ओ वहाँक स्थानीय सर्वसाधारणसे दुःख पाई नैहुइना बटैले बटै । धनगढीमे सोम्मारके रोज पत्रकार सम्मेलन करटी उहाँ सीमा विवादके समस्या समाधान कैना सरकारहे आग्रहसमेत करल बटै ।
उहाँ जैविक विविधतासे भरिपूर्ण रानीसैन नेपालके उत्कृष्ट गन्तव्य बने सेक्ना सम्भावना रहल बटैलै । रानीसैनके प्रचारप्रसारके लाग वहाँ जैटी रहल धनगढी उपमहानगरके टोलीहे सीमा विवादके कारण हुम्लाके स्थानीयसे भर्खर लौटाडेहल रहिट कलेसे हिमाली गाउँपालिकाके टोलीउप्पर आक्रमण करल रहे । घटनापाछे वहाँ जैना पर्यटकके टमान समूह लौटल रहिट । ‘विवादके कारण आमनागरिक ओ पर्यटकसे दुःख पाई नैपरल । यकर समाधान करेपरठ,’ नगरप्रमुख हमाल कहलै, ‘यी नेपालके एक नम्बर गन्तव्य बने सेकी । आमनेपालीसे वहाँसे फाइदा लेहे सेक्ही ।’ उहाँ राज्यके उपस्थिति नैडेखल बटैले बटै ।
राज्यके उपस्थिति नैहुके जे बल्गर बा ओहे मनपरी कैना करल डेखल हमाल बटैलै । वहाँक राज्यके उपस्थिति बिल्कुल नैहो । न फोन लागठ,’ उहाँ कहलै, ‘पहिलसे थिचोमिचो हुइना रहल बा ।’
सरकारके नक्सामे उ क्षेत्र सुदूरपश्चिममे डेखल ओरसे रानीसैन सुन्दर बा कहिके डेखैना अपनेहुक्रे रानीसैन जाई खोजल हमाल बटैलै । ‘हम्रे न लडाइँ करे गैल रही, न विवादबारे थाहा रहे,’ उहाँ कहलै, ‘प्रचारप्रसारमे बल पुगे कहिके प्रयास करल हुई । जौन अभिनसम गुमनाम जस्टे बा ।’ घटनाबारे प्रशासनसे अपनेहुकनहे जानकारी नैकराइलफे नगरप्रमुख हमाल बटैलै ।
हुम्लाके स्थानीयसे गैत ३ गते वडासदस्य पेमा गुरुङके परिवारहे मरणासन्न हुइना करके कुटपिट करटी उहाँक घर कब्जामे लेके बैठलेसेफे प्रशासनसे यीबारे सूचना नैडेहल उहाँ बटैलै । ‘घटना ३ गते हुइल रहे । वडा सदस्यके परिवारहे पिटके बन्दी बनाके धारल रहे । उहे घरमे मेस चलाके बैठल रहिट,’ उहाँ कहलै, ‘यैसिन सूचना पाइल हुइलेसेसे हम्रे वहाँ जैना नैरही । धनगढी उपमहानगरसे सुरु करल सुदूरपश्चिम चिन्हैना अभियान निरन्तर चल्टी रना हमाल बटैले बटै ।
पत्रकार सम्मेलनमे उपमहानगरके सूचना प्रविधि अधिकृत अनुप भट्ट अभियानअन्तर्गत उपमहानगरके टोली लाम्पाटा पुग्दासमके विवरण प्रस्तुत करल रहिट ।
