राष्ट्रिय मानव अधिकार आयोगके २६औँ वार्षिकोत्सव मनागिल
पहुरा समाचारदाता
धनगढी, १४ जेठ । “जीवन, मर्यादा, समानता र स्वतन्त्रताको अधिकार दिगो शान्ति र समृद्धिको आधार” कना मूल नारासहित राष्ट्रिय मानव अधिकार आयोगके २६औँ वार्षिकोत्सव मनागिल बा ।
राष्ट्रिय मानव अधिकार आयोग सुदूरपश्चिम प्रदेश कार्यालयसे आयोजित कार्यक्रम प्रदेश कार्यालय प्रमुख मानबहादुर कार्कीके अध्यक्षतामे सम्पन्न हुइल हो । कार्यक्रममे सुदूरपश्चिम प्रदेश प्रहरी प्रमुख डिआइजी ओम राना, जिल्ला प्रशासन कार्यालय कैलालीके प्रमुख जिल्ला अधिकारी हिरालाल रेग्मी, जिल्ला प्रहरी कार्यालय कैलालीके डीएसपी योगेन्द्र तिमिल्सेना, टमान सुरक्षा निकायके प्रतिनिधि, मानव अधिकारकर्मी तथा सरोकारवाला निकायके प्रतिनिधिहुकनके सहभागिता रहल रहे ।
कार्यक्रमहे सम्बोधन करटी राष्ट्रिय मानव अधिकार आयोग सुदूरपश्चिम प्रदेश कार्यालय प्रमुख मानबहादुर कार्की मानव अधिकारके संरक्षण, प्रवद्र्धन ओ सम्मान बिना लोकतन्त्र सुदृढ हुई नैसेक्ना बटैले बटै । उहाँ प्रत्येक नागरिकके जीवन, स्वतन्त्रता, समानता ओ मर्यादाके अधिकार सुनिश्चित कैना राज्यके प्रमुख दायित्व रहल उल्लेख करलै ।
कार्की मानव अधिकारके संरक्षणके लाग राज्यके सक्कु निकायबीच सहकार्य आवश्यक रहल बटैटी नागरिकमे मानव अधिकारसम्बन्धी चेतना अभिवृद्धि कैना आयोग निरन्तर सक्रिय रहल धारणा रख्लै । जिम्मेवार ओ उत्तरदायी समाज निर्माणके लाग मानव अधिकारप्रति संवेदनशीलता आवश्यक रहल उहाँक कहाई रहे ।
ओस्टेक प्रमुख जिल्ला अधिकारी हिरालाल रेग्मी मानव अधिकारके सम्मान ओ कानुनी शासनके प्रभावकारी कार्यान्वयनसे केल्ह समाजमे शान्ति, सुशासन ओ विकास सम्भव हुइना बटैलै । उहाँ अधिकारसँगे नागरिकके कर्तव्यफे ओटरे महत्वपूर्ण रहल उल्लेख करटी राज्यके निकायसे मानव अधिकारमैत्री सेवा प्रवाहहे प्राथमिकता डेहेपर्नामे जोड डेलेै ।
मानव अधिकार संरक्षणके लाग प्रशासन, सुरक्षा निकाय, नागरिक समाज तथा सञ्चार क्षेत्रबीच प्रभावकारी समन्वय आवश्यक रहल वक्ताहुक्रे बटैले रहिट । कार्यक्रममे सहभागीहुक्रे मानव अधिकारके सुनिश्चिततासे केल्ह दिगो शान्ति, सामाजिक न्याय ओ समृद्धिके आधार तयार हुइना निष्कर्ष व्यक्त करल रहिट ।
कार्यक्रममे मानव अधिकारके वर्तमान अवस्था, चुनौती ओ आगामी कार्यदिशाबारे समेत छलफल करल रहे । सहभागीहुक्रे समावेशी, न्यायपूर्ण ओ मानव अधिकारमैत्री समाज निर्माणके लाग साझा प्रतिबद्धता व्यक्त करल रहिट ।
