लैङिक तथा यौनिक अल्पसंख्यक समुदायहे अभिनफे विभेद कायमे बा
पहुरा समाचारदाता
धनगढी, १७ जेठ । लैङिक तथा यौनिक अल्पसंख्यक समुदायहे अभिनफे विभेद कायमे रहल बटागिल बा ।
यौनिक तथा लैङिक अल्पसंख्यकहरुको महासंघ नेपालके आयोजनामे प्राइड परियोजना अन्र्तगत अँटवारके रोज धनगढीमे हुइल लैङिक तथा यौनिक अल्पसंख्यक समुदायमे मुद्दामे संचारकर्मीनके भूमिका विषयक अन्तरक्रिया कार्यक्रममे लैङिक तथा यौनिक अल्पसंख्यक समुदायहे अभिनफे विभेद कायमे रहल बटागिल हो ।
डिसिएके मनिला न्यौपाने प्राइड परियोजनाके बारेमे जानकारी डेटी लैङिक तथा यौनिक अल्पसंख्यक समुदायहे हरेक निकायमे सहभागी नैहुइल बटैली । उहाँ कहली, यी समुदायके अर्थपूर्ण सहभागी हुई पर्ना हो मने राजनीतिक संरचनाके बनावट ओ परम्परागत सोचके कारण विभेद कायम बा । राजनितिक चेतनाके रुपमे अभिनफे पाछे परल बा ।
यूरोपियन यूनियनके शिव भण्डारीफे अब्बेसम संघीय सांसदमे सुनिल बाबु श्रेष्ठके प्रतिनिधित्व डेखलमे यी बरस भुमिका श्रेष्ठके उपस्थिति हुइलेसे प्रदेश ओ स्थानीय तहमे प्रतिनिधित्व नैहुइल बटैलै । लैङिक तथा यौनिक अल्पसंख्यक समुदाय मतदाताके रुपमे पाछे परल बटैलै ।
व्लु डायमण्ड सोसाइटीके मनिषा ढकाल लैङिक तथा यौनिक अल्पसंख्यक समुदायके प्रकार ओ ओइनसे भोग परल समस्याबारे जानकारी डेहल रहिट । लैङिक तथा यौनिक अल्पसंख्यक समुदाय भिटर जैविक लिङ, अन्तरलिङगी, लैङिक पहिचान ओ लैङिक प्रस्तुती, सामाजिक लिङ, पारलैङिक, तेस्रोलिङगी, यौन अभिमुखीकरण, द्वाय लिङगी, गैर द्वाय सांख्यिक लैङिक, क्वाइरके बारेमे जानकारी डेहल रहिट ।
उहाँ आपन कथा सुनैटी पहिले लउण्डाके रुपमे जलम लेहल मने स्वभाव लउण्डी रहल अब्बे आके लउण्डीके रुपमे रहल बटैली । कार्यक्रममे सिमरन शेरचन मिडिया ओ लैङिक यौनिक अल्पसंख्यक समुदायके अधिकार ओ आन्दोलनबारे प्रस्तुत करल रहिट । कार्यक्रमके संचालन तथा सहजीकरण यौनिक तथा लैङिक अल्पसंख्यकहरुको महासंघ नेपालके फेकल पर्सन धनबहादुर चौधरी करल रहिट ।
