प्रेरणादायी युवाके वृत्तचित्र प्रदर्शन
पहुरा समाचारदाता
धनगढी, २० जेठ । अपने डेखल सपना पूरा करेक लाग सङ्घर्ष करटी रहल तीन जाने प्रेरणादायी युवाके बारेमे तयार पारल वृत्तचित्र ‘आशा ड्रिम्स इन मोसन’ धनगढीमे प्रदर्शन करल बा ।
बालबालिकाके शिक्षाके क्षेत्रमे काम करटी आइल युनिसेफसे कैलालीके दीपशिखा चौधरी, जाजरकोटके दिनेश परियार ओ जनकपुरके जियाकुमारी साहके आगामी लक्ष्य ओ उहीहे पूरा करटी रहल सङ्घर्षउप्पर तयार पारल वृत्तचित्र प्रदर्शन करले हो ।
कैलालीके हसुलियास्थित दीपेन्द्र माध्यमिक विद्यालय कक्षा १२ मे अध्ययनरत दीपशिखासे भविष्यमे अपनहे साइबर सुरक्षाकर्ता (इथिकल ह्याकर) के रुपमे चिन्हाई खोजल बटी ।
ओस्टेक करके, अध्ययनसंगे वातावरण संरक्षणके क्षेत्रमे क्रियाशील दिनेशसे भविष्यमे वातावरणविद बन्न चाहना
राखल बटै ।
२० वर्षीया जियाकुमारी भर मैथिली चित्रकलाममे अपन हात चलैटी रहल बटी । चित्रकला सम्बन्धी अध्ययनसंगे मैथिली कला झल्कैना चित्र क्यानभासमे उटारके उहाँ बिक्रीसमेत करटी रहल वृत्तचित्रमे डेखल बा ।
वृत्तचित्र प्रदर्शनपाछे आयोजित संवाद कार्यक्रममे प्रदेश नीति तथा योजना आयोगके उपाध्यक्ष डा. जीवन राना नवप्रर्वतन ओ युवा लक्षित कार्यक्रम प्रदेश सरकारके प्राथमिकतामे रहल बटैली ।
ओस्टे, सामाजिक विकास मन्त्रालयके सचिव डा. हेमराज रेग्मी श्रम बजारमे जासेकल युवासे असक्षम महसुस कैना करल ओरसे प्रदेश सरकारसे जनशक्तिहे सक्षम बनाइक लाग टमान कार्यक्रम सञ्चालन करटी रहल बटैलै ।
युनिसेफ धनगढी प्रमुख इन्द्रराज पन्तवृत्तचित्रसे किशोर किशोरी हुकनके सपनाहे डेखाइल बटैलै ।
यी वृत्तचित्रसे युवाहुक्रे कटरा क्षमतावान बटै कना बाट डेखाइल उहाँके कहाई रहे । वृत्तचित्र
प्रदर्शनीमे टमान विद्यालयके विद्यार्थी, शिक्षक, सर्वसाधारण लगायतके सहभागिता रहे ।
