प्रदेशस्तरीय होमस्टें महोत्सव सुरु

पहुरा समाचारदाता
धनगढी, २० जेठ । टमान जातजाती तथा समुदायमे संचालित होमस्टेके बजारीकरण ओ व्यवसायीकरण कैना उ्द्देश्यके साथ यहाँके संस्कार, संस्कृति, भेषभूषा प्रवद्र्धन संरक्षणके लाग दुसरा सुदूरपश्चिम प्रदेश स्तरीय होमस्टे मेला महोत्सव मंगरके रोजसे भादामे सुरु हुइल बा ।

थारु होमस्टे गाउँ भादा पर्यटन विकास तथा व्यवस्थापन समितिके आयोजनामे यिहे जेठ जेठ १९, २० ओ २१ गते सम प्रदेश स्तरीय होमस्टे मेला महोत्सव हुइटी रहल हो ।

महोत्सवके उदघाटन सुदूरपश्चिम प्रदेश सरकारके उद्योग पर्यटन वन तथा वातावरण मन्त्री शिवराज भट्ट करल रहिट । महोत्सवके उदघाटन करटी उहाँ यी महोत्सवसे पर्यटन विकासमे टेवा पुगैनाके साथे यहाँके संस्कार, संस्कृति, भेषभूषा प्रवद्र्धन संरक्षणमे समेट सहयोग पुग्ना बटैलै । उहाँ कहलै, सुदूरपश्चिम प्रदेश ढेर सम्भावना बा । यहाँ रहल पर्यटकीय स्थल, कला, संस्कृति ओ परम्पराके प्रचारप्रसार करे नैसेक्गिल हो ।

कार्यक्रममे सुदूरपश्चिम प्रदेश सरकारके उद्योग पर्यटन वन तथा वातावरण मन्त्रालयके सचिव दिर्घ नारायण कोइराला, रामारोशन गाउँपालिका अध्यक्ष मानबहादुर विष्ट, चैतन्य पाठशालाके निर्देशक कटकबहादुर सिंह, प्राकृतिक स्रोत द्वन्द रुपान्तरण केन्द्र नेपालके पश्चिम संयोजक बल्लु चौधरीलगायत मन्तव्य राखल रहिट ।

होमस्टे (घरबास) महासंघ नेपाल सुदूरपश्चिम अध्यक्ष दिनेश दहित परम्परा, संस्कार, संस्कृति, खानपान, भेषभुषा, सीपकला, प्राकृतिक सम्पदा पर्यटकीय गन्तब्यके पचार प्रसार ओ सुदुरपश्चिमके पहिचानहे होमस्टे पर्यटन व्यवसाय मार्फत राष्ट्रिय तथा अन्तराष्ट्रियस्तरमे पुगाइक लाग होमस्टे कार्यक्रम एवं सुदुरपश्चिम प्रदेश स्तरीय होमस्टे मेला महोत्सवके आयोजना करल जनैलै ।
होमस्टे (घरबास) महासंघ नेपालके केन्द्रीय उपाध्यक्ष तथा कैलाली इन्चार्ज लक्ष्मीनारायण चौधरीके अध्यक्षतामे हुइल महोत्सवमे उदघाटन कार्यक्रममे उहाँ प्रत्येक दिन सुदुर पश्चिमके टमान जात जाती तथा समुदायके नाँच गान प्रस्तुती, (हिमाल, पहाड, तराई), दैनिक सुदूरपश्चिमके टमान समुदायके खानपान छानी छानी खान पैना व्यवस्था करल बटैलै ।

महोत्सव अवधिभर शुक्लाफाँटा राष्ट्रिय निकुञ्जमे जंगल सफारी, टमान खेलकुद जस्टे श्लो साईकल रेस, घैटोफोर, भलादमी दौड, पेनाल्टी सुटआउट, प्रत्येक दिन स्थानीय तथा राष्ट्रिय कलाकारके बेजोड प्रस्तुती, थारु हस्तकलाके प्रत्यक्ष अवलोकन, काठे पीङ्ग शयेर हुइना उहाँ जनैलै ।

महोत्सव प्रवद्र्धकमे सुदूरपश्चिम प्रदेश सरकार उद्योग, पर्यटन, वन तथा वातावरण गन्त्रालय, धनगढी, कैलाली ओ समन्वय तथा सहकार्य होमस्टे (घरबास) महासंघ नेपाल सुदूरपश्चिम प्रदेश कार्य समिति, धनगढी, कैलाली रहल बा ।

सुदूरपश्चिम प्रदेशके कैलालीमे १५, कञ्चनपुरमे पाँच, डडेल्धुरा २, डोटी २, अछाममे ४, दार्चुलामे ४, बझाङमे २ बैतडीमे २ करके जम्मा ३६ ठो होमस्टे दर्ता हुइल होमस्टे (घरबास) महासंघ नेपाल सुदूरपश्चिम अध्यक्ष दिनेश दहित जनैलै । ओम्नेसे १७ ठो सामुदायिक, १५ ठो नीजि ओ अन्य स्थानीय तहमे दर्ता हुइल ५ ठो रहल उहाँ जनैलै ।

प्रदेशमे अथाह प्राकृतिक, धार्मिक, सास्कृतिक, ऐतिहासिक पर्यटकीय गन्तव्य बटै । ओस्टेक करके परम्परा, खानपान, संस्कार ओ संस्कृति बा कलेसे टमान जातजाती, समुदायकेफे अपने मौलिक परम्परा, खानपान, रहनसहन, संस्कार ओ संस्कृति बा । अथाह सम्भावना ओ अवसर रह–रहटीफे हमार परम्परा, खानपान, रहनसहन, संस्कार ओ संस्कृति लोप हुइना अवस्थामे बा टबमारे यी सुदूरपश्चिम प्रदेशमे होमस्टे मार्फत यहाँके कला, संस्कृति, परम्परा तथा पर्यटकीय गन्तव्यके संरक्षण ओ प्रवर्दधनमे टेवा पुगल अध्यक्ष दिनेश जनैलै । कार्यक्रम संचालन राज चौधरी करल रहिट ।