थारू म्यजिक भिडियो ‘एकठो राज’ सार्वजनिक
पहुरा समाचारदाता
धनगढी, २० जेठ । सुलभ फिल्मस् प्रालिके प्रस्तुतीमे निर्माण हुइल थारू म्यजिक भिडियो ‘एकठो राज’ सार्वजनिक हुइल बा ।
बुधके धनगढीमे एक कार्यक्रमके बिच म्युजिक भिडियो सार्वजनिक करल हो । कार्यक्रमके बर्का पहुना राष्ट्रिय थारु कलाकार मञ्च सुदूरपश्चिम प्रदेशके अध्यक्ष संगत चौधरी म्युजिक भिडियो सार्वजनिक करल हुइट ।
म्युजिक भिडियोहे सार्वजनिक कैटी उहाँ थारु लोक कला संस्कृति संरक्षण करक लाग सक्कु कलाकार एकजुट हुइना आवश्यक रहल बटाइल रहिट ।
कार्यक्रममे थाकसके केन्द्रीय पार्षद माधव थारु थारु लोक कला संस्कृति संरक्षणसे लेके थारुनके हक अधिकार, सामाजिक मुद्धा लगायत विषयबस्तु समेटल म्युजिक भिडियो फेन निर्माण करे पर्ना आवश्यकता रहल बटाइल रहिट ।
नेपाल पत्रकार महासंघ कैलाली जिल्ला अध्यक्ष श्रवण देउवा म्युजिक भिडियोहे व्यवसायीक रुपमे आघे बह्राइ पर्ना जोड डेहल रहिट । कार्यक्रममे शिखर मिडिया प्रालिका राजकुमार जोशी, जिभि मोबाइल पोइन्टके गोविन्द मुखिया, निर्देशक चन्द्र चौधरी चाँद लगायत मन्तब्य राखल रहिट ।
कार्यक्रममे म्युजिक भिडियोके गीतकार हिरालाल थारु म्युजिक भिडियोमे सामाजिक घटना तथा विषय वस्तुहे डेखाइ खोजल बटाइल रहिट ।
जिभि मोवाइल प्वाइन्ट ओ माया फेन्सी स्टोर धनगढीके सहयोग रहल म्युजिक भिडियो सुलभ् फिल्मस् प्रालिके आधिकारिक युट्युव च्यानलसे सार्वजनिक हुइल बा । आर्दश महतोके निर्देशनमे बनल म्युजिक भिडियोमे विनर चौधरी ओ मेनुका रौराके मुख्य भूमिका रहल बा । गीतमे समीक्षा चौधरी ओ हिरालाल थारु स्वर रहल बा कलेसे म्युजिक कम्पोजर बिजय चौधरीके रहल बा ।
म्युजिक भिडियोके छायांकन ओ एडिटिङ दया शंकर चौधरीके रहल बा कलेसे असिस्टेन्ट क्यामेरा पर्सनमे यश कुश्मी, मेकअपमे जुना दहित रहल बटै ।
शुलभ फिल्मस् प्रालिके दया शंकर चौधरीके अध्यक्षतामे हुइल कार्यक्रमके सञ्चालन अनिल कुश्मी करल रहिट ।
