बजेटमे कार्यक्रम समावेश करके कार्यान्वयन कैना सुझाव

पहुरा समाचारदाता
धनगढी, २४ जेठ । सुदूरपश्चिम प्रदेश सरकारसे नीति तथा कार्यक्रममे समेटके कतिपय कार्यक्रमहे बजेटमे समावेश नैकरल औंल्याइल बा ।

महालेखा परीक्षकके आठौं वार्षिक प्रतिवेदनसे वार्षिक नीति तथा कार्यक्रममे समेटल कतिपय कार्यक्रम बजेटमे समावेश नैकरल औंल्याइल हो । महालेखा परीक्षकके कार्यालयले नीति तथा कार्यक्रममे उल्लेख हुइल कार्यक्रमहुकनहे बजेटमे समावेश करके कार्यान्वयन कैना प्रदेश सरकारहे सुझाव डेहल बा ।

प्रतिवेदन अनुसार प्रदेश सरकारके आर्थिक वर्ष २०८१÷८२ के वार्षिक नीति तथा कार्यक्रममे उल्लेख हुइलमध्ये कृषि उस्मायन केन्द्रके स्थापना, हत्केलामे कृषि सेवा, एक जिल्ला एक उद्योग, युवा वैज्ञानिक प्रोत्साहन नीति तथा कार्यक्रममे उल्लेख हुइलेसे बजेटमे समावेश करल नैहो । ओस्टेक करके, मुख्यमन्त्री स्वास्थ्य क्षेत्र सुधार तथा पोषण सुरक्षा कार्यक्रम, प्रदेशके राजधानी निर्माण प्रक्रिया, हेलो सरकार कार्यक्रम, विकास निर्माण एवम् सेवा प्रवाहके एकीकृत विद्युतीय अभिलेखीकरण एवम् विद्युतीय अनुगमन प्रणालीके कार्यान्वयन बजेटमे समावेश नैहुइल प्रतिवेदनमे उल्लेख बा ।

ओस्टेक करके, प्रदेश आयोजना बैंक तर्जुमा दिग्दर्शनमे समावेश हुइल बमोजिम प्रदेश आयोजना बैंक व्यवस्थापन सूचना प्रणालीके प्रयोगफे बजेटमे समावेश नैहुइल प्रतिवेदनमे उल्लेख करल बा ।

प्रदेश गौरवके आयोजना छनोट सम्बन्धी मापदण्ड निर्धारण करके हाल सञ्चालित आयोजना करके पुनरावलोकन करके विषयगत क्षेत्र समेटना करके प्राविधिक, आर्थिक, सामाजिक तथा वातावरणीय दृष्टि सम्भाव्य आयोजनाके प्रदेश गौरवके आयोजनाके रुपमे छनोट कैना कार्यक्रम बजेटमे समावेश करल नैहो । ओस्टेक, कृषि साथी कृषि एम्बुलेन्स, आन्तरिक आयहे थप सुदृढ बनैना राजस्व नीति तर्जुमा कैना कार्यक्रमफे बजेटमे समावेश नैहुइल उल्लेख बा । नीति तथा कार्यक्रममे समावेश हुइल कार्यक्रम बजेटमे व्यवस्था करके कार्यान्वयन करेपर्ना प्रतिवेदनमे औंल्याइल बा ।

ओस्टेक करके, यी आर्थिक वर्षके बजेट वक्तव्यमे उल्लिखित कार्यक्रममध्ये सुशासन सम्बन्धी अध्ययन कार्यदलसे डेहल प्रतिवेदनके सुझावहुकनके कार्यान्वयन नैकरल प्रतिवेदनमे उल्लेख बा । मुख्य न्यायाधिवक्ताके कार्यालयके संस्थागत सुदृढीकरण ओ कर्मचारीहुकनके क्षमता विकासके कार्य, सेवा प्रवाहहे स्वच्छ, निष्पक्ष, दक्ष, सबल ओ सुशासनमैत्री बनैना प्रदेशस्तरीय प्रशासनिक पुनर्संरचनाके कार्यहे आघे बह्रैना कार्य बजेट वक्तव्यमे समेटलेसेफे कार्यान्वयन नैहुइल जनाइल बा । प्रदेशस्थित कार्यालय, तालिम केन्द्र एवम् निर्देशनालयके सुदूढीकरण तथा खारेजीके लाग उच्च स्तरीय कार्यदल गठन करके प्राप्त सिफारिसहे कार्यान्वयन कैना लगायतके कार्यक्रम कार्यान्वयन हुइल नैहो । बजेट वक्तव्यके कार्यान्वयन हुई पर्ना महालेखा परीक्षकके कार्यालयसे प्रदेश सरकारहे सुझाव डेहल बा ।

आन्तरिक मामिला मन्त्रालय अन्तर्गत कानुुन मन्त्रालयमे सूचना समन्वय कक्षके स्थापना, प्रदेशसंग सीमा जोरल अन्तर्राष्ट्रिय नाकामे वैदेशिक रोजगारीके लाग बाहिरना ओ स्वदेश लौटना नागरिकके अभिलेख व्यवस्थापनके लाग आवश्यक प्रविधिके विकास कैना नीति तथा कार्यक्रम बजेटमे समावेश नैहुइल जनाइल बा । ओस्टेक करके वैदेशिक रोजगारीसे लौटल नागरिकके लाग रोजगारमूलक कार्यक्रमके सञ्चालन कैना लगायतके नीति तथा कार्यक्रम बजेटमे समावेश नैहुइल जनाइल बा ।

महालेखा परीक्षकके कार्यालयसे नीति तथा कार्यक्रममे समावेश हुके बजेट वक्तव्यमे नैसमेटल ओ बजेट वक्तव्यमे समावेश करकेफे कार्यान्वन नैहुइल कार्यक्रमहे बजेटमे व्यवस्था ओ कार्यान्वन कैना महालेखा परीक्षकके कार्यालयसे प्रदेश सरकारहे सुझाव डेहल बा ।