धनगढी उपमहानगरसे ३ वर्षमे संस्थागत स्कुलमे कक्षा ११–१२ के ९१७ विद्यार्थीहे डेहल छात्रवृत्ति
पहुरा समाचारदाता
धनगढी, २४ जेठ । धनगढी उपमहानगरपालिकासे कक्षा ११ ओ १२ मे अध्ययनरत तथा अध्ययन कैना जैना विद्यार्थीहे लक्षित करके सञ्चालन करल छात्रवृत्ति कार्यक्रममार्फत पछिल्का तीन वर्षमे ९१७ जाने विद्यार्थीहे छात्रवृत्ति प्रदान करल बा ।
उपमहानगरपालिकाके शिक्षा, युवा तथा खेलकुद महाशाखाके अनुसार आर्थिक रूपमे कमजोर मने जेहेन्दार विद्यार्थीहे संस्थागत विद्यालयमे अध्ययन कैना अवसर उपलब्ध करैना उद्देश्यसे यी कार्यक्रम सञ्चालन करल हो ।
आर्थिक वर्ष २०८१ से २०८३ सम ९१७ जाने विद्यार्थी यी कार्यक्रमअन्तर्गत छात्रवृत्ति प्राप्त करल बटै । तथ्यांक अनुसार आर्थिक वर्ष २०८१ मे २७६ जाने, २०८२ मे २८३ जाने ओ २०८३ मे ३५८ जाने विद्यार्थीहे छात्रवृत्ति प्रदान करल बा । अघिल्का वर्षके तुलनामे चालु आर्थिक वर्षमे छात्रवृत्ति पैना विद्यार्थीके संख्या उल्लेखनीय रूपमे वृद्धि हुइल डेखजाइठ ।
तीन वर्षके अवधिमे विज्ञान संकायओर सबसे ढेर ४७५ जाने विद्यार्थी छात्रवृत्ति पैले बटै । ओस्टेक व्यवस्थापन संकायओर ३४३ जाने, होटल व्यवस्थापनओर ५२ जाने, कानूनओर २७ जाने, शिक्षाओर ९ जाने तथा मानविकी संकायओर ३ जाने विद्यार्थी लाभान्वित हुइल बटै ।
चालु आर्थिक वर्ष २०८३ मे केल्ह विज्ञानओर १७३ जाने, व्यवस्थापनओर १३९ जाने, होटल म्यानेजमेन्टओर २६ जाने, मानविकीओर २ जाने, शिक्षाओर १ जाने ओ कानूनओर १ जाने करके कुल ३५८ जाने विद्यार्थीहे छात्रवृत्ति प्रदान करल उपमहानगरपालिका जनैले बा ।
यी आघेक वर्षमे संस्थागत विद्यालयमे उपलब्ध छात्रवृत्ति कोटाके लाग प्रतिस्पर्धात्मक परीक्षा प्रणालीमार्फत विद्यार्थी छनोट करटी आइलमे यी वर्ष भर एसइईके नतिजाके आधारमे छात्रवृत्ति प्रदान करल रहे ।
कार्यक्रमसे आर्थिक रूपमे विपन्न, जेहेन्दार तथा अवसरसे वञ्चित विद्यार्थीहे गुणस्तरीय शिक्षामे पहुँच विस्तार कैना महत्वपूर्ण भूमिका खेलल उपमहानगरपालिकाके कहाई बा । उपमहानगरपालिकाके अनुसार छात्रवृत्ति कार्यक्रमसे उच्च माध्यमिक तहके अध्ययनमे विद्यार्थीहे प्रोत्साहन कैनाके साथे शैक्षिक अवसरके समानता कायम कैना सहयोग पुगैटी रहल बा । आगामी वर्षमेफे कार्यक्रमहे निरन्तरता डेटी अझ प्रभावकारी बनैना जनाइल बा ।
