सुदूरपश्चिम प्रदेश निर्माण व्यवसायी महासंघके अध्यक्षमे फेरसे स्वार
पहुरा समाचारदाता
धनगढी, २४ जेठ । सुदूरपश्चिम प्रदेश निर्माण व्यवसायी महासंघके १८ औँ वार्षिक साधारण सभा तथा ९ औँ अधिवेशनसे वर्तमान अध्यक्ष लक्ष्मण कुमार स्वार पुनः अध्यक्ष पदमे निर्वाचित हुइल बटै ।
शनिच्चर सम्पन्न निर्वाचनमे स्वार अपन प्रतिस्पर्धी किशोर ठकुराठीहे पराजित करटी अइना तीन वर्षके लाग महासंघके नेतृत्व पुनः अपन पक्षमे पारल हुइट । स्वार १८३ मत प्राप्त करेबेर ठकुराठी ७४ मत केल्ह पैले बटै ।
निर्वाचनमे विजयी हुइलपाछे अध्यक्ष स्वार सक्कु निर्माण व्यवसायीके विश्वास, साथ ओ समर्थनप्रति आभार व्यक्त करटी अपने आउर ढेर जिम्मेवार बनल बटैले बटै । नवनिर्वाचित अध्यक्ष स्वार कहलै,–“महीहे फेरसे नेतृत्वके जिम्मेवारी प्रदान करुइया सक्कु निर्माण व्यवसायी संघरीयनहे हृदयसे धन्यवाद डेना चाहटु । यी जित मोर व्यक्तिगत जित नैहो, सक्कु निर्माण व्यवसायीहुकनके जित हो । निर्माण क्षेत्र अब्बे टमान चुनौतीस् गुजरटी रहल अवस्थामे व्यवसायीके हकहित संरक्षण, भुक्तानी समस्या समाधान, व्यवसायिक वातावरण सुधार तथा महासंघहे आउर सशक्त ओ प्रभावकारी बनैना दिशामे प्रतिवद्धताके साथ काम कैना नव निर्वाचित अध्यक्ष स्वार बटैलै ।
उहाँ निर्वाचनहे स्वस्थ लोकतान्त्रिक अभ्यासके रूपमे लेटी प्रतिस्पर्धी उम्मेदवारहुकनहे समेत धन्यवाद डेले बटै । महासंघभिटरके एकता, सहकार्य ओ व्यवसायीके साझा हितहे प्राथमिकतामे धारके आघे बह्रना अध्यक्ष स्वाँर बटैलै । ओस्टेक करके वरिष्ठ उपाध्यक्षमे कमलेश कुमार कपाडी, उपाध्यक्षमे पदम भण्डारी ओ मदन मोहन विष्ट, महासचिवमे खेमराज जोशी, उपमहासचिव (नीतिगत) मे आङदावा शेर्पा, उपमहासचिव (आन्तरिक) मे राजेश गिरी, कोषाध्यक्षमे निर्मल कुमार देउवा तथा सह–कोषाध्यक्षमे निर्मला सापकोटा (भट्ट) निर्वाचित हुइल बटै ।
ओस्टेक करके सदस्यमे महासंघके सदस्यमे दिनेश राज भट्ट, राजेश मधिकर्मी, अमर सिंह रावल, विनोद प्रसाद भट्ट, सुनिल कुँवर विजयी हुइल बटै । ओस्टेक करके, तिन सदस्य निर्विरोध निर्वाचित हुइल बटै । दाउत तामाङ, रोहित बोगटी ओ गोरे सिंह ऐर निर्विरोध निर्वाचित हुइल बटै । २८२ मतदाता रहल महासंघमे २६४ जाने मतदान करल रहिट ।
नवनिर्वाचित कार्यसमितिसे अइना तीन वर्ष निर्माण व्यवसायीके पेशागत हकहित संरक्षण, निर्माण क्षेत्रके समस्या समाधान तथा व्यवसायिक वातावरण सुदृढीकरणमे केन्द्रित हुके काम कैना अपेक्षा करल बा ।
