रास्वपा कैलाली सभापतिमे कविन्द्र ठकुल्ला निर्वाचित
पहुरा समाचारदाता
धनगढी, २५ जेठ । राष्ट्रिय स्वतन्त्र पार्टी (रास्वपा) कैलालीके सभापतिमे कविन्द्र ठकुल्ला निर्वाचित हुइल बटै । नयाँ नेतृत्व चयनके लाग अँटवार रात हुइल निर्वाचनसे ठकुल्ला ३३५ मतसहित सभापतिमे निर्वाचित हुइल हुइट ।
उहाँक प्रतिद्वन्द्वी महेश कुमार चौधरी ३७ ओ हरी रेग्मीसे २२ मत प्राप्त करले बटै । उपसभापतिमे रामलखन चौधरी विजयी हुइल बा । पाँच जाने प्रतिस्पर्धीहे पराजित करटी चौधरी १५२ मत प्राप्त करलै ।
सचिवमे मदनराज जोशी विजयी हुइल बटै । उहाँ तीन जाने प्रतिस्पर्धीहे पराजित करटी निर्वाचित हुइल हुइल हुइट । सहसचिवमे गणेशबहादुर शाही निर्वाचित हुइलै ।
सदस्यमे लक्ष्मी रावल पौडेल, लक्ष्मी भट्ट, जंगबहादुर आले मगर, दीपक विक ओ नरदीप बहादुर धामी निर्वाचित हुइल बटै ।
ओस्टे, कैलाली–१ के निर्वाचन क्षेत्र सदस्यमे टंकप्रसाद जैशी ढुंगाना, २ मे कृष्णबहादुर विष्ट, ३ मे बासुदेव घरेडी ओ ४ मे दुर्गा अधिकारी निर्वाचित हुइल बटै ।
अध्यक्षके उम्मेदवार हरी रेग्मी ओ महेश चौधरीसे निर्वाचन समिति अवैधानिक हुइल तथा मतदाता नामावलीमे धाँधली हुइल कहटी चुनाव बहिष्कार करल रहिट । दुनु जानेक बहिष्कारबीच रास्वपासे मतदान प्रक्रिया आघे बह्राइल रहे । कुल ५०८ मतदाता रहलमे ३३५ मत खसल निर्वाचन समिति जनैले बा ।
