वृहत प्रतिभा प्रतियोगिता हुइना
पहुरा समाचारदाता
धनगढी, २५ जेठ । सुदूरपश्चिम प्रदेशमे पहिलचो वृहत प्रतिभा प्रतियोगिता हुइना हुइल बा ।
कलोसन पव्लिकेशन प्रालिके आयोजनामे प्रतियोगिता हुइना हुइल हो । सोम्मारके धनगढीमे पत्रकार सम्मेलन मार्फत प्रतियोगिता बारे जानकारी डेहल हो । कलोसन पव्लिेकेशन प्रालिके कार्यकारी निर्देशक दीप श्रेष्ठ प्रतियोगिता बारे जानकारी कराइल हुइट ।
उहाँ प्रदेशमे पहिलचो आयोजना हुइ लागल प्रतियोगितासे इ क्षेत्रके साथे देशभर रहल प्रतिभाहे राष्ट्रिय तथा अन्तराष्ट्रिय पहिचान डेहुवाइना, कला तथा संस्कृतिके संरक्षण ओ प्रवद्र्धन कैना तथा अवसरके सिर्जना कैना महत्वपूर्ण भूमिका खेल्ना विश्वास व्यक्त करल रहिट ।
कार्यकारी निर्देशक श्रेष्ठ प्रतियोगिता मार्फत टमान क्षेत्रके प्रतिभाहे अकके मञ्चमे आपन कला, क्षमता ओ सिर्जनशीलता प्रस्तुत कैना अवसर प्रदान कैना बटैलै । कार्यक्रममे गायन, नृत्य, अभिनय, वाद्यवादन, चित्रकला, कविता बाचन, मोडलिङ, लोककला, लोकगायन, लोकनृत्य, मार्सल आर्ट, जादुकला, हस्तकला, मूर्तिकला, मिमिक्री, स्टेज पर्फर्मेन्स, सांस्कृतिक प्रस्तुति, हेयर स्टाइलिङ, मेकअप आर्ट, बिटबक्स, व्याप, हिपहप, साइकल स्टन्ट, स्केटिङ, कमेडी प्रस्तुति, एड्करिङ, कथा बाचन लगायत अन्य विविध सिर्जनात्मक तथा कलात्मक विधाके प्रतिभा सहभागिता जनाइ सेक्ना आयोजक जनैले बा ।
कार्यक्रमके मुख्य उद्देश्य नेपालभर रहल प्रतिभाशाली व्यक्तिहुक्रनके खोजी तथा प्रवद्र्धन कैना, ओझेलमे रहल प्रतिभाहे राष्ट्रिय स्तरके मञ्च उपलब्ध करैना, कला तथा संस्कृतिके संरक्षण ओ प्रवद्र्धन कैना तथा युवाहुक्रनमे सकारात्मक सोच, आत्मविश्वास ओ नेतृत्व क्षमताके विकास कैना रहल प्रालिके प्रवन्ध निर्देशक सुष्मा श्रेष्ठ बटैली ।
कार्यक्रम तीन चरणमे सञ्चालन कैना आयोजक जनैले बा । पहिल चरणमे अडिसन राउन्ड सञ्चालन कैके सहभागीहुक्रनके प्रारम्भिक प्रतिभा मूल्याङ्कन करजैना बा । अडिसनसे छनोट हुइल प्रतियोगीहे डोसर चरण अर्थात् अनलाइन भिडियो राउन्डमे सहभागी हुइना बटै, जहाँ ओइनके प्रस्तुति भिडियोमार्फत मूल्याङ्कन करजैना बा । ओकरपाछे उत्कृष्ट प्रतियोगीहे ग्रान्ड फिनालेमे सहभागी कराके अन्तिम प्रतिस्पर्धामार्फत विजेता घोषणा करजैना बा ।
कार्यक्रममे सहभागी हुउइया इच्छुक व्यक्ति एकसय फारम शुल्क बुझाइ पर्ना बा कलेसे अनलाइन भिडियो राउन्डके लाग एकहजार भिडियो मेकिङ शुल्क निर्धारण करल बा ।
कार्यक्रमके विजेता नगद रु दुईलाख, ट्रफी, प्रमाणपत्र तथा आकर्षक गिफ्ट ह्याम्पर प्राप्त कैना जनाइल बा । ओस्टके उत्कृष्ट २५ जाने प्रतियोगीहे जनही पाँचहजार नगदसहित प्रमाणपत्र तथा आकर्षक गिफ्ट ह्याम्पर प्रदान करजैना बा । साथे उत्कृष्ट ५ जाने प्रतिभाशाली सहभागीहे विद्यालयमे छात्रवृत्तिके विशेष व्यवस्था समेत करल बा ।
