भारतमे नेपालीहे बन्धक बनाके रख्न गिरोहके १३ जाने पक्राउ
पहुरा समाचारदाता
धनगढी, २६ जेठ । सुदूरपश्चिम प्रदेश प्रहरीसे नेटवर्किङ व्यवसायके नाममे सर्वसाधारणहे ठगी कैना गिरोहहे भारतसे नियन्त्रणमे लेले बा ।
जिल्ला प्रहरी कार्यालय कैलाली ओ सुदूरपश्चिम प्रदेश प्रहरी कार्यालयसे भार्त स्थित नेपाली राजदुतावासके सहयोगमे भारतीय सञ्चालन करल विशेष अभियानमार्फत उ गिरोहके सदस्यहे भारतसे पक्राउ करके नेपाल ल्यानल जनैले बा । प्रहरीके अनुसार भारतीय दूतावासमे कार्यरत प्रहरी वरिष्ठ उपरीक्षक (एसएसपी) प्रकाश मल्लके सक्रिय समन्वय ओ सहयोगमे अपरेशन सफल हुइल हो ।
प्रहरीसे प्रारम्भिक अनुसन्धानके क्रममे ओइने नेटवर्किङ व्यवसायके प्रलोभन डेखके टमान व्यक्तिसे रकम असुलल पाइल जनाइल बा । घटनामे संलग्न अन्य व्यक्तिहुकनके खोजी तथा थप अनुसन्धान जारी रहल प्रहरी जनैले बा ।
ओस्टे, उ गिरोहसे ठगल दाबी करटी पीडितहुक्रे प्रहरी सम्पर्कमे अइना क्रम जारी रहल बा । पीडितहुकनके संख्या ओ ठगी रकमबारे विस्तृत विवरण संकलन हुइटी रहल प्रहरी जनैले बा ।
स्रोतके अनुसार पक्राउ परुइया १३ जाने रहल बटै । ओइने नेटवर्किङ स्क्याम (ठगी) सम्बन्धी घटनाके अनुसन्धान करेबेर पक्राउ परल हुइट ।
सुदूरपश्चिम प्रदेश प्रहरी कार्यालयके टोलीसे काल्ह २५ गते साँझ ओइनहे पकरके धनगढी ल्यानल हो । भारतके उत्तराखण्डस्थित एक सहरसे पकरल ओइनहे प्रहरीस भर कञ्चनपुरके भीमदत्त नगरपालिका–११ स्थित गड्डाचौकी नाकासे नियन्त्रणमे लेके नेपाल भिटराइल दाबी करले बा ।
पक्राउ परुइयामे सागर विक, सुरज विक, प्रकाश अर्याल, दिनेश काफ्ले, पंकज विक, रित भुजेल, दीपेश तामाङ, रामबलक मण्डल, प्रभाष विक, सुमन घिमिरे, धिरज सुनुवार, विक्रम परियार ओ विशाल खत्री रहल बटै । प्रहरीके अनुसार ओइने जागिर लगैना कहटी प्रलोभन डेखाके भारतमे लैजाके ठग्न ओ बन्धक बनाके असुली कैना समेत करल रहिट ।
अब्बे ओइनहे पक्राउ करके थप अनुसन्धान तथा कानुनी प्रक्रिया आघे बढाइल सुदुरपश्चिम प्रदेश प्रहरी कार्यालयके प्रमुख प्रहरी नायब महानिरीक्षक ओम राना बटैलै । पछिल्का समय नेपाल प्रहरीसे भारतमे समेत टमान अपरेशन करटी अपराधी नियन्त्रणमे लेना क्रम बह्राइल बा ।
