समाजसेवी पन्तसे ट्रयाकसुट सहयोग
पहुरा समाचारदाता
धनगढी, २६ जेठ । बैतडीके पुर्चौडी नगरपालिका–१० विजयपुरस्थित रौलेश्वर माध्यमिक विद्यालयमे अध्ययनरत विद्यार्थीहुकनहे ट्रयाकसुट वितरण करल बा ।
‘खान पुगे, धन पुगे अभियान नेपाल’ के आयोजनामे सञ्चालन करल शैक्षिक सामग्री सहयोग कार्यक्रम अन्तर्गत समाजसेवी तथा निसर्ग हस्पिटल एण्ड रिसर्च सेन्टरके अध्यक्ष तीर्थराज पन्तसे ५० थान ट्रयाक सुट सहयोग प्रदान करल हुइट ।
अपन तथा गोसिनीया मिरा थपलियाके जन्मदिनके अवसर पारके पन्तसे विद्यालयके विद्यार्थीहुकनहे ट्रयाकसुट सहयोग करल हो । सामाजिक सेवामे निरन्तर सक्रिय रहटी आइल पन्त जन्मदिनहे औपचारिक उत्सवके रूपमे मनैनासेफे समाजके आवश्यकता हुइल वर्गहे सहयोग कैना ढेर अर्थपूर्ण हुइना बटैलै ।
हस्तान्तरण कार्यक्रममे बोल्टी ‘खान पुगोस, धन पुगोस अभियान नेपाल’ के सदस्य घनश्याम भट्ट दुर्गम क्षेत्रके विद्यार्थीके शैक्षिक विकासमे सहयोग पुग्न उद्देश्यसे टमान सामाजिक अभियान सञ्चालन करटी आइल बटैलै । यैसिन सहयोगसे विद्यार्थीहुकनमे विद्यालयप्रति आकर्षण बह्रनाके साथे अध्ययनमे थप उत्साह मिल्न विश्वास व्यक्त करल बा ।
सहयोग स्वरूप प्राप्त ट्रयाकसुटसे विद्यार्थीहुकनके पठनपाठनमे सकारात्मक ऊर्जा ठप्न विश्वास करल बा । सामाजिक उत्तरदायित्वहे व्यवहारमे उटरटी जन्मदिनके अवसरमे करल यी सहयोगसे शिक्षा क्षेत्रमे प्रेरणादायी सन्देश डेहल बा ।
