धनगढी उपमहानगरसे ३५८ विद्यार्थीहे छात्रवृत्ति वितरण

पहुरा समाचारदाता
धनगढी, २८ जेठ । धनगढी उपमहानगरपालिकासे कक्षा ११ ओ १२ मे अध्ययनरत तथा अध्ययन करे जैना विद्यार्थीनहे लक्षित करटी सञ्चालन करल छात्रवृत्ति कार्यक्रम अन्तर्गत चालु आर्थिक वर्ष २०८३ मे ३५८ जाने विद्यार्थीहे छात्रवृत्ति प्रदान करले बा ।
उपमहानगरपालिकाके शिक्षा, युवा तथा खेलकुद महाशाखाके अनुसार आर्थिक अवस्था कमजोर हुइल तथा जेहेन्दार विद्यार्थीहे संस्थागत विद्यालयमे अध्ययन कैना अवसर उपलब्ध करैना उद्देश्यसे सञ्चालित कार्यक्रममार्फत छात्रवृत्ति प्राप्त कैना विद्यार्थीहे बुधके सिफारिस पत्र वितरण करल हो ।

धनगढी उपमहानगरपालिकाके सभा हलमे आयोजित छात्रवृत्ति वितरण, शुभकामना तथा बधाई कार्यक्रममे छात्रवृत्तिके लाग छनोट हुइल सक्कु विद्यार्थीहे बोलाके सिफारिस पत्र हस्तान्तरण करल रहे । कार्यक्रममे धनगढी उपमहानगरपालिकाके नगर प्रमुख गोपाल हमालसे विद्यार्थीहुकनहे बधाई तथा शुभकामना व्यक्त करटी गुणस्तरीय शिक्षाके अवसरहे सदुपयोग कैना आग्रह करलै ।

उपमहानगरपालिकासे पछिल्का तीन वर्षमे कुल ९१७ जाने विद्यार्थीनहे छात्रवृत्ति प्रदान करल जनैले बा । तथ्याङ्कअनुसार आर्थिक वर्ष २०८१ मे २७६, आर्थिक वर्ष २०८२ मे २८३ ओ आर्थिक वर्ष २०८३ मे ३५८ जाने विद्यार्थी छात्रवृत्ति प्राप्त करले बटै । अघिल्का वर्षके तुलनामे यी वर्ष छात्रवृत्ति प्राप्त कैना विद्यार्थीके संख्या उल्लेखनीय रूपमे वृद्धि हुइल बा ।

तीन वर्षके अवधिमे विज्ञान संकायओर सबसे ढेर ४७५ जाने विद्यार्थी छात्रवृत्ति प्राप्त करले बटै । ओस्टे व्यवस्थापन संकायओर ३४३, होटल म्यानेजमेन्टओर ५२, कानूनओर २७, शिक्षाओर ९ तथा मानविकी संकायओर ३ जाने विद्यार्थीहे छात्रवृत्ति प्रदान करल बा । चालु आर्थिक वर्ष २०८३ मे केल्ह विज्ञानओर १७३, व्यवस्थापनओर १३९, होटल म्यानेजमेन्टओर २६, मानविकीओ २, शिक्षाओर १ ओ कानूनओर १ जाने करके कुल ३५८ जाने विद्यार्थी छात्रवृत्तिके लाग छनोट हुइल बटै ।

धनगढी उपमहानगरपालिकासे संस्थागत विद्यालयमे उपलब्ध छात्रवृत्ति कोटामे विगतमे प्रतिस्पर्धात्मक परीक्षा प्रणालीमार्फत विद्यार्थी छनोट करटी अइलेसेफे यी वर्ष भर एसईईके नतिजाके आधारमे छात्रवृत्ति प्रदान करल जनैले बा ।

उपमहानगरपालिकाके अनुसार यी कार्यक्रमसे आर्थिक रूपमे विपन्न, जेहेन्दार तथा अवसरसे वञ्चित विद्यार्थीहे गुणस्तरीय शिक्षामे पहुँच विस्तार कैना महत्वपूर्ण भूमिका खेलल बा । साथे उच्च माध्यमिक तहके अध्ययनमे प्रोत्साहन कैनाके साथे शैक्षिक अवसरके समानता कायम कैनाफे कार्यक्रम प्रभावकारी बन्टी गैल जनैले बा ।

उपमहानगरपालिकासे आगामी वर्षमे समेत छात्रवृत्ति कार्यक्रमहे निरन्तरता डेटी अभिन प्रभावकारी रूपमे सञ्चालन कैना जनैले बा ।