चैतन्य पाठशालाके आयोजनामे वृहत रक्तदान तथा निःशुल्क स्वास्थ्य शिविर
पहुरा समाचारदाता
धनगढी, ३१ जेठ । सामाजिक उत्तरदायित्वहे व्यवहारमे उटरटी चैतन्य पाठशालाके आयोजनामे वृहत् रक्तदान कार्यक्रम तथा निःशुल्क स्वास्थ्य शिविर सफलतापूर्वक सम्पन्न हुइल बा ।
मानव सेवा सबसे भारी धर्म हो कना भावनाहे आत्मसात् करटी आयोजना करल उ कार्यक्रममे विद्यार्थी, शिक्षक, अभिभावक तथा स्थानीय समुदायके उत्साहजनक सहभागिता रहे ।
कार्यक्रममे १४ जाने रक्तदाताहुक्रे रक्तदान करके जीवन बचैना पुण्य कार्यमे योगदान डेले बटै । पछिल्का समय टमान अस्पतालमे रगतके अभाव हुइटी रहल बेला रक्तदाताहुक्रे डेहल रगतसे बिरामीहुकनमे जीवन बचैना महत्वपूर्ण भूमिका खेल्न विश्वास व्यक्त करल बा । रक्तदान करुइया सक्कु रक्तदाताहुकनके योगदानके उच्च कदर करटी ओइनहे प्रमाणपत्र प्रदान करके सम्मान करल रहे ।
रक्तदान कार्यक्रमसंगे सञ्चालन करल निःशुल्क स्वास्थ्य शिविरमे ६० से ढेर व्यक्तिहुक्रे स्वास्थ्य परीक्षण सेवा लेहल रहिट ।
शिविरमे सहभागीहुकनहे स्वास्थ्य अवस्था सम्बन्धी परामर्श, सामान्य स्वास्थ्य परीक्षण तथा आवश्यक सुझाव प्रदान करल रहे । स्वास्थ्य परीक्षणसे ढेर व्यक्तिहुक्रे आपन स्वास्थ्य अवस्थाबारे जानकारी प्राप्त करल चैतन्य पाठशालाके स्कुल नर्स गायत्री उपाध्या बटैली ।
चैतन्य पाठशालासे अइना दिनमेफे शिक्षा, स्वास्थ्य, वातावरण संरक्षण तथा सामाजिक सेवासंग सम्बन्धित यैसिन जनहितकारी कार्यक्रमहे निरन्तरता डेना जनैले बा । विद्यालयसे समाजसंगके सहकार्यहे आउर बल्गर बनैटी समुदायके हित ओ विकासके लाग थप रचनात्मक कार्यक्रम सञ्चालन कैना पाठशालाके प्राचार्य प्रेमनिधि ओझा बटैलै ।
मानव सेवाके उत्कृष्ट उदाहरणके रूपमे सम्पन्न हुइल उ रक्तदान कार्यक्रम तथा निःशुल्क स्वास्थ्य शिविरसे समाजमे सहयोग, सहकार्य ओ मानवताके भावनाहे थप मजबुत बनाइल सहभागीहुकनके कहाई रहल रहे ।
