शहिद दशरथ चन्द स्वास्थ्य विज्ञान विश्वविद्यालय सरसफाई
पहुरा समाचारदाता
धनगढी, ८ सावन । धनगढी उपमहानगरपालिकाके नगर प्रमुख गोपाल हमालके नेतृत्वमे गेटास्थित शहिद दशरथ चन्द स्वास्थ्य विज्ञान विश्वविद्यालय परिसरमे वृहत् सरसफाई अभियान सञ्चालन करल बा ।
विश्वविद्यालयके उपकुलपति प्रा. डा. सुनिलकुमार जोशीके आह्वानमे आयोजना करल उ सरसफाइ कार्यक्रममे नगर प्रमुख हमालसहित जनप्रतिनिधि, उपमहानगरपालिकाके कर्मचारी तथा नगर प्रहरी बलके सक्रिय सहभागिता रहे ।
सरसफाई अभियानहे प्रभावकारी बनैना उपमहानगरपालिकासे टमान मेसिन तथा उपकरण प्रयोग करल रहे । अभियानके क्रममे सात ठो ब्याकुलोडर, घाँस कटना मेसिनसहितके एक ट्याक्टर तथा एक ग्रेडर परिचालन करल रहे ।
अभियानके क्रममे विश्वविद्यालय परिसरभिटर रहल फोहोर, झारपात तथा अव्यवस्थित सामग्री हटैटी वातावरणहे स्वच्छ, सफा ओ व्यवस्थित बनैना कार्य करल सहभागीहुक्रे बटैले बटै ।
कार्यक्रममे नगर प्रमुख गोपाल हमालसे सुदूरपश्चिम प्रदेशके गौरवके रूपमे रहल शहिद दशरथ चन्द स्वास्थ्य विज्ञान विश्वविद्यालयके विकास ओ संरक्षणम सक्कु पक्षके साझा जिम्मेवारी रना उल्लेख करलै ।
उहाँ कहलै, “सुदूरपश्चिमके सपना बोकल विश्वविद्यालय निर्माण हुइटी बा । यकर विकास ओ संरक्षणमे सक्कु जाने मिलके योगदान पुगाई परठ ।”
