धर्मशाला छोरना डा. केसीहे समितिके पत्र
पहुरा समाचारदाता
धनगढी, ८ सावन । धनगढीस्थित कृष्ण मन्दिर धर्मशाला व्यवस्थापन समितिसे अनिश्चितकालीन सत्याग्रहमे रहल प्राध्यापक डा. गोविन्द केसीहे धर्मशाला खाली कैना आग्रह करटी पत्र डेहल बा ।
व्यवस्थापन समितिके अध्यक्ष मुक्तिनाथ पन्तसे शुकके बिहान डा. केसीहे पत्र डेहल पुष्टि करटी उहाँ बैठक लाग आइल जानकारी डेलसेफे पूर्वसूचना बिना धर्मशालामे सत्याग्रह सुरु करल बटैलै ।
‘उहाँ बैठक लाग आइल रहिट, मने कौनो जानकारी नैडेके अनसन सुरु करलै,’ अध्यक्ष पन्त कहलै, ‘धार्मिक संस्थामे अनसन बैठे काहे डेहल कना बाहेरसे दबाब आई लागल । टबमारे धर्मशाला छोरना अनुरोध करल हुई ।’
दबाब के डेहल कना विषयमे भर उहाँ खुलाई नैचाहलै ।
यी आघे बिफे अनेरास्ववियु कैलालीके अध्यक्ष कबेर खड्कासेफे डा. केसीहे धर्मशालामा अनसन बैठेनैडेना व्यवस्थापन समितिहे अनुरोध करल रहिट ।
व्यवस्थापन समितिसे धर्मशाला खाली कैना पत्र डेहलपाछे अबके विकल्पबारे छलफल हुइटी रहल डा. केसीके सहयोगी डा. अमृत जैसी जानकारी डेलै । उहाँक अनुसार डा. केसीसे धर्मशालामे बैठना विषयमे पूर्वजानकारी कराके सत्याग्रह सुरु करल रहिट ।
मने, अब्बे कौन कारणसे स्थान छोरना कहल हो कनाबारे स्पष्ट जानकारी प्राप्त नैहुइल उहाँ बटैलै ।
डा. केसी पाँचबुँदे माग रख्टी बिफेसे धनगढीमे अनिश्चितकालीन सत्याग्रहमे बटै ।
