फोहोर व्यवस्थापनके लाग नेपालगन्जमे सम्बद्ध पक्षविच छलफल
पहुरा समाचारदाता
नेपालगन्ज, ९ सावन । नेपालगन्ज उपमहानगरपालिकाके फोहोर व्यवस्थापनके लाग टमान निकाय, संघ संस्था महासंघ, व्यवसायीक संघसंठन विच वृहत छलफल हुइल बा ।
बास नेपालके आयोजनामे विफेक रोज नेपालगन्जमे सम्पन्न स्थानीय नेतृत्व ओ नागरिक संलग्नता विषयक कार्यक्रममे उ छलफल करल हो । यातायात व्यवसायी, नेपाल घरेलु तथा साना उद्योग नेपालगन्ज उपमहानगरपालिका समिति, होटेल व्यवसायी संघ, गैरसकारी संस्था महासंघ लगातएके संघसंस्थासंग नेपालगन्ज उपमहानगरपालिकाके फोहोरहे कैसिक दिगो रुपमे व्यवस्थापन करे सेक्जाई कना विषयमे छलफल करल हो ।
कार्यक्रममे बोल्टी कार्यक्रममे प्रमुख अथिती पूर्व प्रतिनिधि सभा सदस्य डा. धवल शम्शेर राणा अपने नेपालगन्ज उपमहागरपालिकाके मेयरमे रहेबेर फोहोर व्यवस्थापनके कार्य आघे बह्रैटी प्लाष्टिक मुक्त कार्यहे योजनाबद्ध रुपमे आघे बह्राइल दृष्टान्त रख्टी विविध कारणसे उ कार्य सफल हुई नैसेकलमे चिन्ता व्यक्त करलै ।
उहाँ हाल द कोकाकोला फाउण्डेसनके सहयोग मार्फत नेपालगन्जमे दिगो फोहोर व्यवस्थापनके लाग हाल फेरसे काम सुरु हुइलमे खुसि व्यक्त करटी सक्कुहुनहे उ कार्यमे सहयोग ओ साथ डेना आग्रह करलै ।
कार्यक्रममे वातावरण क्षेत्रमे नम्मा समयसे काम करटी रहल वातावरण विज्ञ हरीप्रसाद सुवेदीसे फोहोर व्यवस्थापनके प्रस्तुतिकरण राखल रहिट । उहाँ फोहोरहे व्यक्तिके व्यवहारसे सफा कैना बानीके विकास नैहुइटसम दिगो समाधान हुई नैसेक्ना बटैटी फोहोर व्यवस्थापन सम्बन्धी खेल मार्फत व्यवहारिक अभ्यास मार्फत सहभागीहुकनहे कार्यक्रममे संलग्न करैलै ।
कार्यक्रममे यातायात व्यावसायी संघ, होटोल व्यावसायी संघ, गैरसरकारी संस्था महासंघ लगाएतसे फोहोरके व्यवस्थापनके लाग आअपन ओरसे प्रतिवद्धता व्यक्त करलै बासके परियोजना अधिकृत रबिन्द्र बोहरासे संचालन करल कार्यक्रममे बासके निर्देशक हेमराज भट्ट उद्देश्यबारे जानकारी करैले रहिट ।
हरित नेपालगन्ज सामुदायिक फोहोर रुपान्तरण परियोजना अन्तर्गत सम्पन्न कार्यक्रमके समापन बासके केन्द्रीय अध्यक्ष शिव कुमार वर्मा करल रहिट ।
