थारू लेखक संघ नेपालके अध्यक्षमे कविता चौधरी
पहुरा समाचारदाता
धनगढी, ९ सावन । थारू लेखक संघ नेपालके अध्यक्षमे कविता चौधरी (काव्य) कैलाली सर्वसम्मत चयन हइल बटी ।
शनिच्चरके धनगढीमे हुइल संघके चौठा अधिवेशनसे अध्यक्ष सहित नौ सदस्यीय लावा कार्यसमिति सर्वसम्मत रुपमे चयन करल हो । संघके उपाध्यक्षमे सुनिता चौधरी (सानु) कञ्चनपुर, राजुराज चौधरी (कैलाली), सहसचिवमे बालमोती चौधरी (कैलाली), कोषाध्यक्षमे लक्ष्मी राना (कञ्चनपुर) रहल बटै ।
ओस्टके सदस्यमे क्रमशः शेखर दहित (बर्दिया), कृष्ण चौधरी (बर्दिया), मनमति बखरिया (कैलाली) ओ कालुराम चौधरी (कैलाली) रहल बटै ।
संघके संरक्षकमे डा. कृष्णराज सर्वहारी ओ सल्लाहकार संयोजक छविलाल कोपिला सहित सल्लाहकारमे जीत चौधरी (ट्रासन), माधव चौधरी, सोम डेमनडौरा ओ नरेश चौधरी रहल बटै ।
थारू लेखक संघ नेपाल थारू भाषा, साहित्य, कला ओ संस्कृतिके उत्थान, संरक्षण तथा प्रवद्र्धनके लाग क्रियाशील थारू साहित्यकार, लेखक ओ स्रष्टाहुक्रनके एक साझा ओ छाता संस्था हो । इ संस्था स्थापनाकालसे नै देशके टमान जिल्लामे थारू साहित्यके विकासके लाग महत्त्वपूर्ण गतिविधि सञ्चालन कैटी आइल बा ।
संघसे राष्ट्रिय थारू साहित्य सम्मेलन प्रत्येक बरसके देशके फरक–फरक जिल्लामे आयोजना कैटी आइल बा । उ सम्मेलन थारू स्रष्टाके विचार मन्थन कैना मुख्य थलो हो ।
साथे संघसे थारू भाषा, साहित्य, ओ मौलिक एवं सांस्कृतिक गीत–संगीतके क्षेत्रमे विशिष्ट योगदान पुगुइया स्रष्टाहे टमान विधामे ’थारू साहित्य पुरस्कार’ तथा सम्मान प्रदान करटी आइल बा ।
