धनगढी उपमहानगरसे पेपरलेस सेवा सुरु

धनगढी, १९ सावन । सुदूरपश्चिमके एकठो किल उपमहानगरपालिका धनगढीसे सरकारी कामकाजहे पूर्णतया प्रविधिमैत्री बनाइक लाग ‘पेपरलेस धनगढी’ सेवाके सुरुवात करले बा । सोम्मारके उपमहानगरमा आयोजित पत्रकार सम्मेलनमार्फत सेवाग्राहीहे कार्यालयसे प्रवाह हुइना सेवाहे प्रविधिमैत्री, छिटोछरितो, पारदर्शी ओ झन्झटमुक्त सेवा डेना उद्देश्यसे नयाँ प्रणाली सुरु करल जानकारी कराइल हो । उपमहानगरके सञ्चार तथा सुचना प्रविधि शाखा प्रमुख इन्जिनियर अनुप भट्टके अनुसार धनगढीमे पाछेक समय बाहिरी जनसंख्याके चाप बह्रटी गैल ओरसे उ डिजिटल प्रणालीसे वास्तविक करदाता ओ नगरवासीके पहिचान कैना सहज बनैना उहाँ उल्लेख करलै ।

उहीसे उपमहानगरसे प्रदान कैना सेवा–सुविधा आपन नागरिकहे प्राथमिकताके साथ उपलब्ध करैना मद्दत पुग्ना शाखा प्रमुख भट्ट बटैलै । उपमहानगरसे प्रवाह हुइना सेवाहे सफल बनाइक लाग एकीकृत डिजिटल प्रणाली (यूडीजीपी) सञ्चालनमे लन्ना जनैले बा । शाखा प्रमुख भट्टके अनुसार अक्के प्रणालीभिट्टर अन्य टमान सफ्टवेयरहे जोरके सेवा प्रवाह करजैना बा । शाखा प्रमुख भट्ट कहलै, ‘ढेर पालिका आआपन सहजताके लाग छुट्टाछुट्टे डिजिटल प्लेटफर्म बनाइबर सूचना एकीकृत हुइ सेकल नैहो । मने धनगढी उपमहानगरसे विकास करे लागल अक्के मूल प्लेटफर्म यूडीजीपीसे सक्कु  विवरण समेट्ना बा । इहीसे नागरिक एकचो अपलोड करल कागजात प्रणालीसे अपनहे ट्र्याक कैना बा । जेकर कारण सेवाग्राही फाइल बोकके बारम्बार कार्यालय आइ पर्ना बाध्यता अन्त्य हुइना बा ।’

उ योजनाके पहिल चरणअन्तर्गत उपमहानगरके १९ वडाके सचिवहे तालिम डेहल बा । उ चरणमे नागरिक ई–केवाईसी, टमान सिफारिस ओ फाइल ट्र्याकिङ अर्थात् कागजात कहाँ पुगल कहिके हेरे मिल्ना प्रणाली बारे सचिवहुक्रनके नेतृत्व विकास

करजैना बा ।

अनलाइन प्रणाली चलैना असमर्थ वा प्रविधिमे साक्षर नैरहल  सेवाग्राहीके लाग उपमहानगरसे कार्यालयमे ‘हेल्पडेस्क’ (सहायता कक्ष) फेन स्थापना करले बा । वहाँ रहल कर्मचारीहे सेवाग्राहीके विवरण डिजिटल माध्यमसे दर्ता कैडेना ओ सेवा प्रदान कैना व्यवस्था मिलाइल शाखा प्रमुख भट्ट जानकारी डेलै ।

शाखा प्रमुख भट्टके अनुसार इ प्रणालीके सुरुवातसँगे आब नगरवासी जन्मदर्ता, नागरिकताके लाग आवश्यक सिफारिस, व्यवसाय दर्ता तथा नवीकरणजैसिन कार्य घरमे बैठके करे सेक्ना बटै ।

यदि कौनो कागजात अपुग हुइलमे वा कुछ समस्या आइलमे कार्यालयसे सम्बन्धित व्यक्तिके मोबाइलमे मेसेज पठैना जनाइल बा ।

सेवाग्राही आपन कागजात मोबाइलमे प्राप्त कैके प्रिन्ट करे सेक्ना बटै कलेसे आधिकारिकताके लाग ओम्ने क्यूआर कोड राखजैना बा, जिहीहे अन्य कार्यालयसे फेन स्क्यान कैके प्रमाणीकरण करे सेकजैना बा ।

ओस्टके, यूडीजीपी ई–सिग्नेचर मोड्युल, डिजिटल अभिलेख व्यवस्थापन प्रणाली, नागरिक गुनासो तथा सुझाव व्यवस्थापन प्रणाली, कार्यालय टिप्पणी लेखन तथा व्यवस्थापन प्रणाली, डिजिटल भुक्तानी तथा राजस्व संकलन प्रणाली, विकास निर्माण अनुगमन तथा सूचना प्रणाली, सार्वजनिक सूचना प्रणाली, कार्यालय विवरण प्रणाली, विपद् प्रणाली, डाटा दृश्यावलोकन प्रणाली, डाटा सुरक्षा प्रणाली लगायत सेवा रहल बावै ।