सावन डोला रानाथारु समुदायके पहिचानः गाउँपालिका उपाध्यक्ष
पहुरा समाचारदाता
धनगढी, १९ सावन । कैलाली जिल्लाके कैलारी गाउँपालिका वडा नम्बर ९ स्थित गदरिया गाउँमे सावनके डोला सुरु हुइल बा । कैलारी–९ गदरिया गाउँमे बैठुइया रानाथारु समुदायसे सोम्मारसे सावनके डोला सुरु करल हुइट । उ डोलाके उदघाटन गाउँपालिका उपाध्यक्ष भगवती कुमारी चौधरी करल रही । सावन डोलाके उदघाटन करटी उहाँ यी रानाथारु समुदायके परम्परासे चल्टी सस्कृति रहल बटैली । उहाँ कहली, सावन डोलामे रानाथारु समुदायके पहिचान बोक्लेसे यिहीसे संरक्षण कैना जरुरी बा । सावन डोला समुदायहे एकता ओ सदभाव जोरना माध्यम हो । संगेसंगे डोला झुल्लेसे आत्मियता बह्रठ, सम्बन्ध और प्रगढ बनठ यिहीसे संरक्षणसंगे प्रवद्र्धन आवश्यक बा । डोला जेफे झुले सेकी, गाउँपालिका उपाध्यक्ष कहली, मने डोला झुलेबेर जौन परम्परासे गीत गाजाइठ उ सक्कु जाने नैजन्ठै । उ गीत लौवा पिठीहे सिखाईपर्ना बा । रहरंगी कैटी सावनमे डोला झुल्ना संस्कृतिहे संरक्षणसंगे प्रवद्र्धन करे नैसेक्लेसे लोप हुइना उहाँ बटैली । गदरिया गाउँक भल्मन्सा बहादुर राना अपनेहुक्रे पुर्खाैसे सावन डोला झुल्टी आइल बटैलै । उहाँ कहलै, लौवा पिढी अध्ययनके सिलसिला, काममे सिलसिलामे सब बाहेर जाई लग्लै, गाउँघर बुढापाखा केल्ह रना ओरसे यी परम्परा हेराई की कना डर बा । रानाथारु समुदायके संस्कृति जोगाइक लाग बुढापाखा लागल उहाँ बटैलै । सावन डोला उदघाटन कार्यक्रम तुल्सा रानाके अध्यक्षतामे हुइल रहे । कलेसे संचालन माया राना करल रही । कार्यक्रममे कैलारी गाउँपालिकाके योजना शाखा प्रमुख सन्तोषकुमार चौधरी, वडा सदस्य अनारकली चौधरी, लक्ष्मी चौधरी, हरिद्वारी चौधरी, सकुन्तला चौधरी, रामकृष्ण चौधरी, गाउँक बुद्धिजिवी तथा महिलाहुकनके सहभागिता रहे ।
