संक्रमणकालिन न्याय ओ एकल महिला सुरक्षा कोषबारे सरोकारवालासे छलफल कार्यक्रम
पहुरा समाचारदाता
धनगढी, १९ सावन । संक्रमणकालिन न्याय ओ एकल महिला सुरक्षा कोषबारे सरोकारवालाहुकनसे मंगरके रोज धनगढीमे छलफल कार्यक्रम सम्पन्न हुइल बा ।
कुर्वे विष्ट्रोके सहयोगमे मानव अधिकारका लागिल महिला एकल महिला समुहके आयोजनामे हुइल कार्यक्रमके प्रमुख अतिथि जिल्ला समन्वय समिति कैलालीके सभापति टीकाकुमारी चौधरीभुल रहल रहिट । कार्यक्रममे सम्बोधन करटी उहाँ द्वन्दकालके प्रभावितहुकनहे मानसिक घाउ अभिन पुरा नैहुइल बटैली । उहाँ कहली, सशस्त्र द्वन्दकालके बेला ढेर महिलाके सिंन्दुर पोछल, ढेर लर्का टुहुरा हुइलै, डाईबाबा सन्तान घुमैलै ।
ओकर पूर्ण रुपमे पूर्ति करे नैसेक्जाई मने ओइनहे परिपुरन कैना जरुरी बा । हरेक स्थानीय तहसे एकल महिला कोष स्थापना कैना जरुरी रहल कहटी जहाँ जहाँ नैहो ओइनहे बनाई कहना बटैली । एकल महिला सुरक्षा कोष स्थापना हुइलेसे समस्यामे परल महिलाहे सपोट करेसेक्ना उहाँ बटैली ।
द्वन्दपभावितहुकनके लाग सदैव आवाज उठैना जरुरी रहल कहटी उ आवाज उठाई छोरलेसे आवाज डब जैना बटैलै । धनगढी उपमहानगरपालिकाके नगर उपप्रमुख कन्दकला कुमारी राना एकल महिला सुरक्षा कोष स्थापना हुई नैसेकल बटैली ।
उहाँ कहली, हमार पालिकासे द्वन्दसे प्रभावित एकल महिलाहुकनहे सदैव सहयोग कैना तयार बा, कोई ओसिन अप्ध्यारोमे परल हुइही कलेसे महिना सचिवालयमे सम्पर्क कैना ओ पालिकासे सहयोग कैना प्रतिवद्धता जनैली । कार्यक्रममे राष्ट्रिय मानप अधिकार आयोग सुदूरपश्चिम प्रदेशके प्रमुख मानबहादुर कार्की संक्रमणकालिन न्याय ओ एकल महिला सुरक्षा कोषबारे प्रस्तुतीकरणकरण करल रहिट ।
उहाँ स्थानीय तहसे एकल महिला सुरक्षा कोष ऐन ओ कार्यविधि बनाके अपनही संचालन करेसेक्ना ओ संघसे ओम्ने रकम थप्टी जैना बटैलै । कार्यक्रममे इन्सेक सुदूरपश्चिम प्रदेश संयोजक खडकराज जोशी, फाया नेपालके गोमा आचार्य, गणेश मल्ललगायत आपन बाट राखल रहिट ।
मानव अधिकारका लागिल महिला एकल महिला समुहके जिल्ला अध्यक्ष मनोधरी भण्डारीके अध्यक्षतामे हुइल कार्यक्रमके संचालन तथा सहजीकरण समुहके प्रदेश कार्यक्रम अधिकृत वेद अवस्थी करल रहिट । कार्यक्रममे स्थानीय तहके उपप्रमुख, सरोकारवाला निकाय, द्वन्द प्रभावित तथा एकल महिलाहुकनके सहभागिता रहे ।
