एक लाख ५९ हजार सामान सहित चार जाने पक्राउ
पहुरा समाचारदाता
धनगढी २२ सावन । कैलाली ओ कञ्चनपुर जिल्लाके टमान ठाउँसे एक लाख ५९ हजार ६ सय बराबरके सामान प्रहरीसे बरामद करले बा ।
कञ्चनपुरके बेलौरी न.पा.१ खल्लासे अबैंध रुपमे भारतसे भन्सार छलि करके ल्यानल अन्दाजी मूल्य रु. ५७ हजार बराबरके सामान बरामद कैगिल हो ।
प्रहरी चौकी फटैया, कञ्चनपुरसे खटल प्रहरीसे बिफेके रात ३ क्विन्टल ५० किलो लाही ओ ४ थान साइकल सहित लखिमपुर खिरी बसही कलौनी बैठना बर्ष २२ के सन्तोश कुमार, वर्ष २० के अनुज गुप्ता, वर्ष २४ के सञ्जय कुमार ओ वर्ष २१ के मनोज कुमारहे उ सामान सहित फेला पारके चार जानेहे नियन्त्रणमे लेहल बा ।
ओस्टेक, उहे न.पा.२ बैजुडाँडासे अवैध रुपमे भारतसे भन्सार छलि करके ल्यानल अन्दाजी मूल्य रु. २५ हजार ६ सय बराबरके पेय पदार्थ, बिडी, बोइलर मुरगी लगायतके सामानहे बिफे प्रहरी चौकी टेडुवा, कञ्चनपुरसे खटल प्रहरी बेवारिसे अवस्थामे फेला पारके नियन्त्रणमे लेहल बा ।
कैलालीके जिल्लाके टमान ठाँउसे अवैध रुपमे भारतसे भन्सार छलि करके ल्यानल अन्दाजी मूल्य रु. ७७ हजार बराबरके बिडी, सुर्ति, सिद्रा माछा लगायतके सामानहे बिफेके रोज जिल्ला प्रहरी कार्यालय कैलाली मातहत कार्यालयसे खटल प्रहरी बेवारिसे अवस्थामे फेला पारके नियन्त्रणमे लेहल बा ।
