अबैध लागुऔषध सहित छ जाने पक्राउ
पहुरा समाचारदाता
धनगढी ५ कुवाँर । कैलाली ओ कञ्चनपुर जिल्लाके टमान ठाउँसे अवैध लागु औषध सहित छ जाने पक्राउ परल बटै ।
कैलाली जिल्लाके जानकी गा.पा.८ भोक्सीसे अवैध लागूऔषध खैरो हिरोइन १ ग्राम ८८० मिलिग्राम सहित जोशीपुर गा.पा.३ बैठना वर्ष ४८ के प्रमेश्वर डगौरा थारूहे पक्राउ करल बा ।
अँटवारके दोप्हर इलाका प्रहरी कार्यालय टीकापुर, कैलालीसे खटल प्रहरी टोली शंका लागके चेकजाँच करेबेर उ पदार्थ फेला पारके पक्राउ करल हो ।
ओस्टेक करके, कैलाली जिल्लाके धनगढी उ.म.न.पा.७ भानुचोकसे अवैध लागूऔषध ब्राउनसुगर ४६० मिलिग्राम सहित उहे उ.म.न.पा.१ बसन्त टोल बैठना वर्ष २१ के असिम चौधरी समेत ४ जानेहे पक्राउ कैगिल बा ।
अँटवारके रात जिल्ला प्रहरी कार्यालय कैलालीसे खटल प्रहरी टोली शंका लाग चेकजाँच करटी उ पदार्थ फेला पारके पक्राउ करल बा । इ सम्बन्धमे प्रहरी आवश्यक अनुसन्धान करटी रहल बा ।
ओस्टेक करके, कञ्चनपुर जिल्लाके कृष्णपुर न.पा.९ पिपरिया स्थित लागूऔषधके कारोवार हुइटी रहल बा कना गोप्य सुचनाके आधारमे उ ठाउँ बैठना वर्ष ३४ के रामनरेस रानाहे पक्राउ करल बा ।
अँटवारके दोप्हर अवैध लागूऔषध खैरो हेरोइन १ ग्राम ४६० मिलिग्राम ओ नगद १० हजार रूप्या सहित पक्राउ करल हो ।
लागूऔषध नियन्त्रण ब्यूरो शाखा कार्यालय धनगढी ओ इलाका प्रहरी कार्यालय रैकवार, कञ्चनपुरसे संयुक्त रुपमे खटल प्रहरी टोलीसे उहाँके घरकोठा खाँनतलासी करटी उ पदार्थ फेला पारके पक्राउ करले बा । इ सम्बन्धमे प्रहरी आवश्यक अनुसन्धान करटी रहल जनैले बा ।
